Despues cu Corsou a haya un ‘aanwijzing’ (instruccion), un gran incertidumbre y preocupacion ta existi na Aruba riba kico lo sali den nos direccion den e proximo reunion di Conseho di Minister di Reino cu lo tuma luga final di luna di augustus venidero. Ya caba e carta cu Secretario di Estado di Reino, Raymond Knops a manda recientemente pa gobierno di Aruba a bin ta contribui na e clima di incertidumbre y preocupacion aki.
Pa atende e situacion aki y trece un ambiente di trankilidad y confiansa, Minister di Economia y Finansa, Xiomara Maduro, a publica den social media cu e informacion cu ta bin circulando for di fin di siman no ta corecto. Esta cu un carta a yega di Hulanda den cual ta duna gobierno di Aruba 1 luna pa aumenta BBO, manda 300 ambtenaar cas y introduci Sugar-Tax, no ta cuadra cu realidad. Y el a indica cu den e circunstancia actual ‘no tin espacio pa wega politico barata di opositor.’
Segun e mandatario Maduro, locual cu tin riba mesa ta un carta di Secretario di Estado Knops dirigi na Minister President Wever-Croes den cual ta escala e preocupacion di Hulanda pa e situacion financiero di Aruba. Den e carta ta señala e preocupacionnan treci dilanti pa e organo di Supervision Financiero CAft den nan ultimo corespondencia cu Minister di Finansa, y ta relata nan na e Protocol firma na november 2018.
Minister Maduro a indica cu e Secretario di Estado di Reino kier mas claridad riba e reforma fiscal y kier pa inclui e gastonan di personal relata na e plan cu gobierno a traha pa atende cu e crisis social, tambe bou di e plafond di gasto di personal acorda den e Protocol. Secretario di Estado a manda pidi Minister President informacion pa asina por atende cu e situacion di Aruba den e proximo reunion di Conseho di Ministernan di Reino fin di augustus proximo.
Esey ta e esencia –segun minister Maduro- di e carta y e ta di lamenta cu atrobe cierto medionan di comunicacion kier purba bruha tera pa motibo politico. Categoricamente den su publicacion e ta bisa cu na ningun momento e Secretario di Estado a exigi pa hisa BBO, manda hende cas of introduci sugar tax. Igualmente e ta señala cu, con gobierno di Aruba ta cumpli cu locual a wordo acorda den e Protocol, ta prerogativo di Aruba.
El a reitera cu pais Aruba su situacion financiero, debi na e mega debe crea pa e gobierno anterior. Tambe el a laga sa cu gobierno actual ta atendiendo e retonan na un forma diligente y transparente, y ta invita oponentenan pa corda riba bienestar di full Aruba. Segun Minister Maduro, bruhamento di tera ta causa intrankilidad bou pueblo y daño innecesario na nos pais.
Mientras cu Minister Presidente, Evelyn Wever-Croes a referi durante su ultimo conferencia di prensa, cu no tin niun instruccion y tampoco KB pa Aruba. Esaki despues di e instruccion cu Corsou a haya, locual a genera hopi comentario na Aruba. Esta si Aruba tambe lo haya un, of si lo tin un KB na caminda pa nos pais.
Durante e ultimo reunion cu Minister Presidente a atende di Conseho di Minister di Reino dia 5 di juli ultimo, niun momento a wordo papia of menciona niun KB ni instruccion a bin ‘riba mesa pa loke ta trata Aruba,’ e prome mandatario a bisa.
