Pa oposicion, gobierno ta spanta, ya cu Hulanda ta bin realisa cu nan no ta serio. Ex Minister y Parlamentario, Arthur Dowers a bisa na Bon Dia Aruba cu gobierno mes a pone den nan calculacion pa genera entrada bin cu un Sugar-Tax of aumento di impuesto riba producto di sucu.
Tambe pa bin cu otro medidanan manera mas aumento di BBO a base di nan calculacion pa atende cu e deficit presupuestario. Pues nan ta medidanan cu mester bin na caminda, ya cu esaki tabata e pakete di medidanan cu Minister Presidente Wever-Croes y Minister di Economia y Finansa, a palabra cu Hulanda.
Tambe otro medidanan a keda inclui den nan reforma fiscal y Hulanda ta exigi awor pa Gobierno di Aruba cumpli cu e medidanan cu nan a compromete pa introduci. E Parlamentario a indica cu e reforma fiscal pa Hulanda tin un nificacion: E nombernan di cada medida cu ta bay tuma.
El a referi tambe na e grondbelasting cu temporalmente ta bay duna un grupo di nos comunidad un alivio, pero despues di un aña nan lo sinti un aumento. Ya cu e belasting aki no ta un alivio directo, sino cu e ta indirecto. Ya cu ora gobierno ta bay compra e comerciantenan extra grondbelasting, y e comerciantenan ta bay calcula e gasto aki riba e prijs di nan producto cu nos tur tin cu paga como consumidor. Pues niun di e medidanan cu gobierno ta bay tuma pa cumpli cu e protocol firma ta bay ta na fabor di e pueblo.
Siendo -segun e Parlamentario di oposicion- cu e gobierno aki den campaña a priminti pa no bin cu medida. Mientras cu awor pueblo no ta bay soporta cu nan ta bin cu medidanan pero di otro banda nan ta nombra nan famianan, sin reduci nan gastonan di personal. Tampoco gobierno no a bin cu austeridad riba nan gasto, sino cu nan ta sigui biaha den exterior.
Esaki ta haci –segun Parlamentario Dowers- cu Hulanda ta bin ripara cu e gabinete actual no ta serio pa reduci nan gastonan y atende cu e deficit. Pero si nan ta dispuesto di fia mas placa di loke nan mester pa bin cu un fondo bou e nomber di Crisis Plan Social pa core campaña, segun e Parlamentario di oposicion.
Encuanto loke Minister di Finansa y Economia a trece dilanti riba e carta di Secretario di Estado di Reino, Parlamentario Dowers ta haya cu no ta klop cu realidad. Nan a palabra cu Hulanda cu gasto di personal no mester subi cu cierto cantidad, pero nan a sigui nombra hende den diferente departamento, y Hulanda ta consciente y a ripara esaki. “Hulanda a realisa cu gobierno a crea un fondo adicional di hopi miyon pa gewoon haci politica cu ne,” el a bisa. E Parlamentario ta indica cu e hendenan nombra riba lista di personal di gobierno pa atende cu e Crisis Plan Social, ta pa haci politica cu ne. Te hasta –segun Dowers- nan a nombra hendenan cu no ta cualifica, kier men cu nan no ta yudando pa haci e trabou miho.
El a laga sa cu gobierno no por ehecuta e Crisis Plan Social ya cu e gobierno aki no a haya niun crisis social. Ademas “tur pais na mundo tin problema,” el a bisa. Pero mas bien gobierno ta mal uzando fondo cu den realidad nan por a spaar. Un plan di tres aña pa atende cu un crisis social y ya caba nan mester fia placa delanta pa paga hopi interes riba dje, pa tene e placa un caminda, en bes di fia cada aña. Mientras mas largo bo tuma pa paga, mas placa den interes bo mester paga.
