Den un comunicado di prensa minister encarga cu Finanzas, Xiomara Ruiz-Maduro, a desmenti cu un carta cu a yega di Hulanda, di Secretario di Estado Raymond Knops lo tabata exigi pa aumenta BBO, retira 300 funcionario publico y introduci Sugar-Tax.
Locual tin riba mesa, segun e mandatario, ta un carta di Knops dirigi na Minister Presidente Wever-Croes den cual “ta escala e preocupacion di Hulanda pa e situacion financiero di Aruba.” Den e carta lo ta señala e preocupacionnan treci dilanti pa CAft den nan ultimo corespondencia cu Minister di Finanzas y ta relaciona nan na e protocol firma na november 2018. E Secretario di Estado lo tabata desea mas claridad riba e reforma fiscal y kier pa inclui e gastonan di personal relaciona cu e plan pa atende crisis social bao di e maximo di gasto di personal, acorda den e protocol. Secretario di Estado a manda pidi Minister Presidente informacion pa asina por atende e situacion di Aruba den e proximo reunion di Conseho di Ministernan di Reino fin di augustus proximo, segun e comunicado di e mandatario encarga cu finanzas.
E mandatario ta lamenta den su comunicado cu cierto medionan di comunicacion lo ta trata di bruha tera. Segun e mandatario, na ningun momento Knops lo a referi na aumenta BBO, retira empleado publico o introduci sugar tax. E mandatario ta supone cu e cifra di 300 ambtenaar ta sali for di e negociacion cu a tuma luga recientemente cu sindicato, unda el a informa cu si mester crea espacio pa indexering di 3,6%, anto mester manda 300 empleado publico cas.
Minister ta bisa tambe cu situacion financiero di gobierno ta serio y cu no tin espacio pa wega politico. Tambe cu gobierno ta atendiendo e retonan na un forma diligente y transparente y ta invita oponentenan pa corda riba bienestar di henter Aruba. Den e proximo dianan lo duna mas informacion.
