Cientificonan ta bisa cu nan a casi completamente elimina sanguranan cu ta carga malesa riba dos isla di China uzando un tecnica nobo. Pero no ta algo milagroso, parce cu e no lo ta practico den areanan mas grandi y e lo por costa hopi placa.

Den nan experimento cientificonan a enfoca riba e especie di sangura ‘Asian Tiger Mosquito’. E tipo di sangura aki ta similar na Aedes Aegypti, e sangura conoci pa carga Dengue, Zika y malesanan relaciona den regionnan tropical. E Asian Tiger tambe ta carga e malesanan aki. Pa combati e sangura nan a infecta e insecto cu un bateria cu ta bringa virus, sigui pa un shock chikito di radiacion.

E shock ta pa sterilisa e sanguranan. Ademas despues di captura sanguranan y infecta nan cu e bacteria, cual no ta presente den sanguranan den naturalesa, e bacteria ta stop nan di reproduci. Sanguranan tin mester di e mesun tipo di bacteria pa traha yiu cu lo sobrevivi.

Pa 18 simannan den 2016 y 2017 un ekipo lidera pa Zhiyong Xi na Michigan State University a laga sanguranan masculino los riba dos islanan chikito den Guanghzou, China, un region unda dengue ta prevalece. E cantidad di sanguranan femenino responsabel pa e circulacion di malesa a baha cu 83% pa 94% cada aña, similar na metodonan manera tira insecticida y uza sanguranan modifica geneticamente. Tabatin simannan unda no tabatin señalnan di sanguranan infecta cu malesa mes.

Ningun tecnica te awo a experiencia tanto exito, segun Xi. E problema ta sinta cu nan mester a inunda e isla cu sangura: Casi 4 miyon cada siman. Durante e 2 añanan, nan a calcula cu e cantidad di sangura cu nan a los den naturalesa a yega te 200 miyon.

Scott O’Neill di e World Mosquito Program tabata preocupa su mes cu e cantidad di sangura necesario pa islanan asina chikito. Esun mas grandi tabatin un teritorio di mas o menos 4 miya cuadra. Esaki compara cu Aruba su 69 miya cuadra di teritorio.

‘Ta dificil pa mi mira con por pone esaki traha riba un escala mas grandi pa yuda residentenan’, O’Neill a bisa den un email. Biologo Brian Lovett na University of Maryland na Bethesda a bisa cu esaki no ta un proceso di ehecuta y ta cla. ‘Bo mester keda hacie. Y si bo no keda hacie, e populacionnan por reestablece nan mes basta lihe’, Lovett a bisa.

Esey ta netamente loke a pasa den e experimento: Sanguranan a of muri of a madura di larva pa reemplasa esunnan cu a muri. Lo ta necesario monitor e situacion constant y potencialmente e lo costa hopi placa, segun Lovett.

Gastonan lo baha mane cu e tecnologia avansa, cientificonan a bisa. Nan ta calcula cu e lo por costa entre 42 dollar pa 66 dollar pa cada hectar pa aña. Esey ta mas o menos e prijs di metodonan di sterilisacion den sector primario, mientras e ta mas barata cu cierto insecticidanan. E ultimo aki ta algo cu mas y mas sanguranan ta resistente na dje. E team tin un proyecto andando den un area mas o menos 4 biaha mas grandi cu e sitionan uza originalmente.