Eerste Kamer di Hulanda ta keda critico riba gobierno Hulandes su manera modera ora ta trata di percura pa tin un ricibimento humano di Venezolanonan pidiendo asilo/ migrante riba Corsou y Aruba.
Despues di varios intercambio di carta y debatenan cu Senado a tene cu Secretario di Estado di Relacionnan di Reino, Raymond Knops, e Comisionnan di Senado pa Relacionnan di Reino y di Inmigracion y Asilo a bolbe bek cu mas preguntanan por escrito pa e mandatario.
E comisionnan kier sa e detayenan di e detencion di migrantenan, sea cu nan tin peticion di asilo of no, ademas di kier sa tocante deportacionnan y e Venezolanonan nan situacion di bida riba e isla. Senadornan ta cuestiona abiertamente si e gobiernonan na Aruba y Corsou ta trahando conforme e Convenio Europeo pa Derechonan Humano (EVRM). Ademas e Senadornan kier sa di ki manera gobierno Hulandes ta monitor e cumplimento di derechonan humano na Corsou y Aruba.
E comisionnan den Senado kier haya sa entre otro cuanto personanan procedente di Venezuela ambos pais a deporta ultimo añanan, cuanto di nan tin actualmente deteni y si Venezolanonan ta haya informacion cu nan tin posibilidad pa haci un apelacion riba articulo 3 di EVRM. Tambe nan kier haya sa con serio gobierno Hulandes como gobierno di Reino ta den eherce su funcion di percura, segun articulo 43 inciso 2 di e Statuto, pa tur pais den Reino cumpli cu derechonan humano.
