Minister di Enseñansa Ingrid van Engelshoven lo haya un carta procediente di Corsou entrante e siman aki. E carta ta di parti di su colega Curasoleño di Enseñansa Marilyn Alcalá-Wallé, pidiendo van Engelshoven pa tuma accion en conhunto pa e agresividad cu cual ta cobra debe di estudio di studiantenan Caribense.
Colega di Engelshoven Marilyn Alcalá-Wallé ta haya cu mester bin accion rapido contra e manera di procede di DUO encuanto studiantenan Caribense. Ta trata e metodonan cu DUO ta uza pa cobra studiantenan bek ora nan temporada cu e DUO-lening a caba y ta bira tempo pa paga esaki bek. Ora di calcula e suma cu e studiante mester paga pa luna, ta importante pa tene den consideracion cuanto e studiante berdaderamente por carga (draagkrachtmeting).
Esaki Alcalá-Wallé a bin ta descubri despues di a organisa un encuentro cu studiantenan cu tin problema pa paga e prestamo escolar bek. Durante esaki varios studiante a trece dilanti cu, net e parti di paga bek, ta uno dificil. Tabatin studiantenan cu a meld cu despues cu nan a raporta na DUO cu nan entrada a baha, DUO ta bay over na hisa loke nan ta exigi di studiantenan cada luna.
Tin hopi kehonan tocante e manera agresivo di procede di parti di e Deurwaarder cu DUO ta manda tras studiantenan. Pa via cu e minister a keda confronta cu situacionnan asina pisa cu no a keda mas si no pa declara e situacion ‘insostenibel’. E ta haci un apelacion na su colega van Engelshoven pa bini hunto cu un solucion duradero.
