Companianan na Hulanda cu kier haci negoshi den Caribe Hulandes (BES) y vice versa ta confronta cu gastonan bancario halto. Pa e rason aki ministerio di finanzas tin idea pa cuminsa un banco exclusivamente pa islanan BES.
Un comerciante cu for di cuminsamento di 2019 ta ofreciendo servicionan na clientenan den Boneiro, Saba y Statia a keda sorprendi pa e tarifanan cu banco ta cobra: “Mi ta contento cu e cantidad di pedidonan, pero e ganashi cu mi ta genera, banco ta guli un gran parti di esaki. Mi clientenan riba e islanan mester paga un suma na nan banco djis pa cuminsa, pa asina percura cu ami haya e suma completo.”
Pero aya e problema no ta para. “Mi propio banco tambe ta cobra mi pa cierto gastonan posteriormente. Si mi conta tur e cobransanan chikito di e banco, e ta yega na 10% di e suma di factura. Boneiro, Statia y Saba ta cay bou Hulanda, pero e banconan ta cobra transaccionnan entre Hulanda Europeo y Hulanda Caribense como transferencianan internacional, pa cual nan ta cobra tarifanan haltisimo. Asina como comerciante bo ta perde smaak pa haci negoshi cu nos compatriotanan den Caribe.”
E comerciante no ta worry cu e mester cobra extra pa clientenan riba BES. “Loke si mi no ta compronde ta dicon ley no ta exigi pa banconan cobra tarifanan local ora ta trata di Boneiro, Statia y Saba. Den Haag lo ta mucho chikito si e banconan lo mester cobra gastonan haltisimo pa transaccionnan bayendo e Waddeneilanden.”
Banco pa islanan BES
Ministerio di Finanzas a declara prome cu cuminsamento di aña cu nan lo bay bin cu un propuesta pa kita e drempelnan pa trafico financiero entre Hulanda Caribense y Europeo. Un posibilidad cu ta riba mesa ta e lantamento di un banco pa e islanan BES.
