E clamor ‘ni un mas’ cu ta referi na e asesinato di lidernan social, a resona diasabra pasa den e Congreso Colombiano caminda presidente Ivan Duque a instala e periodo nobo legislativo cu un advertencia pa e guerrilla di ELN cu no lo bay ta un obstaculo pa e paz di e pais.
Durante su discurso, e mandatario a afirma cu mescos e ta rechasa e corupcion, e ta desprecia e asesinato di lider y defensornan di derechonan humano na e pais; un di e piedranan den caminda pa implementa e acuerdo di paz cu FARC, segun e Conseho di Siguridad di Nacionnan Uni den su bishita reciente a manifesta.
E asesinato di lidernan social a aumenta desde e firma di acuerdo di paz cu FARC, na november di 2016, y segun e Defensoria di e Pueblo, e homicidio ta suma 462, mientras cu otro estudio ta calcula cu ta mas di 700, riba cual tin cu agrega 140 ex-combatiente di e guerrilla ey.
Durante e discurso presidencial, Congresista di oposicion, como e partido FARC, e Polo Democratico Alternativo (PDA) y Aliansa Berde, entre otro, a exhibi potretnan di e lidernan social cu a ser asesina y nan a haci un yamada pa e Colombianonan pa manifesta contra e crimen ey den un mobilisacion nacional e proximo 26 di juli.
Durante su intervencion, cu a dura un ora y shete minuut, Duque a adverti pa e guerrilla di Ehercito di Liberacion Nacional (ELN) cu nan no por sigui ta un obstaculo pa paz di e pais.
