Tin cosnan ta pasando cu simplemente no por y fraccion di AVP ta keda atento pa maniobranan cu a bin ta tumando luga y lider di fraccion di AVP, sr Marlon Sneek a mustra cu a pesar di no ta hayando reaccion ni di Presidente di Parlamento y tampoco gobierno, lo sigui insisti pa pueblo haya claridad riba tur cosnan straño cu a bin ta tumando luga.

Sr Sneek a mustra cu e cosnan straño aki ta inaceptabel caminda ya fraccion di AVP a manda un serie di pregunta pero lo bolbe manda un serie di pregunta te ora cu pueblo wordo informa kico gobierno y ministernan ta haciendo.

“Un caso specifico ta relaciona cu Aruba Airlines caminda trahadonan a cuminsa acerca miembronan di nos fraccion cu hopi preocupacion, ya cu ta parce cu Aruba Airlines tin un cuenta basta grandi habri na AAA NV y aki ta trata di un suma di nada menos cu 22 miyon florin.

Relaciona cu esaki nos ta bay manda un serie di pregunta pa e Minister responsabel pa confirma si esaki ta berdad y banda di esaki nos por a tende cu departamento di aviacion civil a cuminsa cu un investigacion pero Minister lo a para e investigacion aki.

Tambe nos por a scucha con Prome Minister Evelyn Wever Croes a declara cu e no sa di nada cu ta tumando luga pero un carta a sali for di Conseho di Minister cu cual a duna nan aprobacion pa bula pa tanto Aruba Airlines y tambe esunnan di W-Aviation y a pesar di e carta aki, Premier ta bisa cu su persona no sa di esaki ya cu e tabata di biahe.

E tipo di cosnan aki ta inaceptabel ya cu con por ta posibel cu e ta di biahe anto e no sa kico ta pasa den su gabinete y e no sa kico ta pasa den su pais.

Sea ta gaña e ta gaña of ta sconde e ta sconde of ta miedo Evelyn Wever Croes tin pa su gobierno no cay, ora cu e sali bisa cosnan manera cu nan ta.

Tur hende sa cu esunnan doño di e aerolinea aki, ta amigonan intimo di Ministernan den e gabinete aki caminda tin ministernan cu ta sali di Aruba pa Venezuela, di eynan pa Miami den avion priva di doñonan di e aerolinea aki pa nan bay sinta wak concierto hunto, nechi sinta banda di otro na mesa, batiendo kelki di champaña na otro.

Sin conta cu esakinan ta e hendenan cu ta haci fiesta ora cu minister su casa haci aña aya na Miami, pues nos kier bay sa kico tin tras di tur e cosnan aki.

Ken y kico Aruba Airlines ta nifica pa e gobierno aki pasobra por mira cu gobierno tin miedo pa atende cu e asunto aki y awor trahadonan ta sacando informacionnan di tur loke ta pasando pa nos.

Es mas, hasta tin informacion cu Aruba Airlines tin Cubanonan den servicio, cu ta bula Cuba-Miami, Miami-Aruba, Aruba-Miami y bay bek Cuba baha nan na Cuba.

Fraccion di AVP kier sa si e tipo di cosnan aki ta berdad, nos kier sa te na unda Gobierno ta protehando nos trahadonan, ya cu ta hopi inkietud tin entre e trahadonan.

Nos a haya un carta basta largo y nos a sinta combersa cu e trahadonan aki y nos a priminti nan cu nos lo bay atende e asunto aki y pa tanto trahadonan como tur hende haya sa kico ta pasando akinan y si nos ta laga un inversionista di afo trapa riba derecho di nos ciudadanonan y si ta laga un inversionista di afo eherce presion riba gobierno pa habri frontera pa nan si haci negoshi y e otronan keda pa nan cuenta.

No por permiti e cosnan aki tuma luga riba custia di nos trahadonan y di nos isla y esaki pa nos ta inaceptabel y p’esey nos ta dirigi un serie di pregunta directamente na e diferente ministernan corespondiente y nos ta spera di por haya contestanan pronto, ya cu aki ta trata di preguntanan cu nos a haya di trahadonan y nos kier contesta pa duna e trahadonan, pa asina nan ta den tur trankilidad di kico realmente ta tumando luga.

No mester lubida cu seis siman pasa e mesun aerolinea aki a trece un avion nobo anto awor diripiente ta bisa cu e lo bay failliet y tin algo cu no ta cuadra den e totalidad aki y nos kier sa si ta ministernan cu ta amigo di e doñonan aki, kier hinca e pais aki den problema pa asina complace cu e doñonan di Aruba Airlines y pa nos esaki ta inaceptabel y p’esey e preguntanan aki y nos ta spera cu pronto nos lo haya e contestanan aki y sigur nos lo bay informa pueblo riba kico realmente ta tumando luga den e caso aki,” lider di fraccion di AVP, Marlon Sneek a declara.