“No ta un secreto cu tur cos cu por a bay robes den Cuerpo Policial, a bay robes. Varios situacion preocupante tumando luga un biaha mas den e siman aki cu mester di atencion inmediato, pero tambe tin cu pone riba lista di prioridad na luga di malgasta capital pa dia na helicopter”, asina Parlamentario Robert Candelaria ta bisa den un declaracion.
Actualmente na Warda di Playa tin e situacion di schimmel cu a causa polisnan a sali for di warda. Esaki no ta algo cu ta tumando luga di awo, ta 24/7 ta traha den un warda, y contrario na otro edificionan, infrastructura/ airco y tur otro cos mester ta diferente. E situacion aki tin basta tempo tumando luga, mescos cu e situacion na Frankrijkstraat. Ta opta pa huur 2 edificio pa un departamento siendo cu ta keda vocifera cu no tin placa. Mesun cos ta sosode cu e helicopter cu ta costando hopi placa pa dia mientras no tin placa pa busca bala pa Cuerpo Policial. Parlamentario Robert Candelaria a bisa ta imposibel pa mira con tin cu bay busca bala na otro isla!
Hopi cosnan tumando luga den Cuerpo Policial
Robert Candelaria a bisa tambe unda cu e bay y combersa cu coleganan, ta sinti cu nan ta hopi demotiva. Esaki ta conta pa tur polis sin excepcion algun. Hopi ta esunnan cu kier bay, of no kier sigui traha mas den Cuerpo y sigur algo cu no ta saludabel pa nan. Hopi lihe mester bin cu un cambio, y e Minister aki tin cu saca su conclusion. E ta guiando un organisacion / un cadena Hudicial y tur caminda tin problema y ta bayendo di “mal a peor”. E tin cu acepta y bisa cu el a purba pero danki mi ta sigui.
“No por ta asina si cu nos Husticia ta den e situacion cu e ta awo. Pues ta den un Crisis completo na man di un Minister incapaz.”
Conseho di Parlamentario Robert Candelaria ta pa un solucion a corto plaso cu lo ta pa cumpli cu ley/ cu regla. Si cumpli cu regla riba con pa atende cu contractnan di edificionan cu tin of esunnan cu a busca pa loco gastando placa desproporcionalmente, hacie di e forma ey. “Planifica y priorisa bo maneho, kico ta e cos cu ta importante; kico dia mi kier nan bay de un edificio nobo; dicon mi kier nan bay; cuanto mi ta bay paga eynan; ki dia ta termina contract; con ta bay regel esey pa move tur hende den un manera corecto.”
Un otro solucion lo ta di evalua e helicopter, cu ta costando mas o menos 200 mil florin pa luna, mientras ta papia di bala di arma pa polis cu lo costa 400 mil florin y esaki den 2 luna bo lo a page. P’esey ta keda cuestiona e prioridadnan unda nan ta y na ken nan ta. E minister tin cu stop di haci cosnan pa cumpli cu brother/ cumpli cu sponsor of loke sea y cuminsa wak locual realmente e dienstnan cu ta cay bou di dje tin mester. Den e caso aki bala pa arma di polis cu ta indispensabel y basico pa Cuerpo Policial. Mañan por bisa tambe no por percura pa nan tin portofon, auto of computer cu ta material basico cu polis mester pa traha cune. Si a yega na e fase aki cu hasta esaki no por keda regla “anto nos ta hopi leu for di cas y den un crisis hopi serio.”
Tin mas auto cu tin Polis pa traha
Algo cu sigur ta capta atencion ta cu actualmente tin mas auto cu tin polis mes pa core aden. Ta conta tambe pa e brommernan nobo. “Tur esakinan ta great , pero unda e prioridad ta? Si tin auto na monton para pafo pero e bala pa hinca den e arma a bira un problema anto nos no por compronde e cos aki. Ta recorda tambe un tempo cu licencia di computer a bira un problema cu a trece dilanti, pero a opta pa bay corta y sinta na un bario post, lagando afo cosnan esencial pa traha cune den nan trabou diario. Tur esaki ta situacionnan cu no por tuma luga,” Candelaria a trece dilanti.
Hasta e ta bisa cu kisas e minister lo a pensa pa busca asina tanto auto pa e polisnan nobo cu lo drenta cuerpo. El a papia di 200 polis den su prome dianan di gobierno, cu tabata un “wishful thinking”, y a cumpra esakinan adelanta. “E no a wak cuanto polis tin en realidad, cua ta servicio cu kier brinda, con kier desplega su hendenan y a base di esey cuanto vehiculo lo tin mester. A haci lo contrario! Prioridadnan robes, falta di conocemento di e trabou, falta di consehonan corecto, ignora conseho al caso y e actitud di sa miho cu cualkier otro ta locual cu tin e pais aki awe confronta cu resultadonan asina aki. Na momento cu situacion bay robes ta culpa dienst/persona y nunca asumi e responsabilidad e mes. Husticia no por traha asina, bayendo 2 aña caba y sigur no por mas. Cuanto mas, no solamente polis pero otro servicionan tambe manera cuerpo di bombero cu tambe tin preocupacionnan, lo tin cu wanta?”
Pa finalisa Robert Candelaria ta bisa, cu pa falta di maneho , falta di prioridad, falta di direccion ta pone cu e dienstnan tin cu sinta cune y na final di dia e pueblo, cu e ta responsabel pe, ta sufri consecuencianan.
