Noticia internacional di ultimo siman a keda domina pa dos noticia: e atentado na Nice y e intento di golpi di estado na Turkia. Sin descarta seriedad y importancia di e mas reciente atentado terorista basa riba odio stimula pa fanatismo religioso, nos ta enfoca un rato riba e sucesonan na Turkia. Pa cuminsa, e intento di un grupo di militar pa tuma gobernacion den nan man a bin como un sorpresa completo. Turkia tin su problemanan pero no ta un pais den caos, a pesar di e situacion dificil crea tambe pa e presencia di miyones di refugiado, principalmente for di Irak y Siria. Por cierto cu Turkia ta un pais cu cada zomer ta ricibi miyones di turista for di Europa, specialmente for di e paisnan cu tin un poblacion grandi di descendencia Turco cu den ultimo decadanan a residencia na Europa, sin mayor problema.
E sorpresa grandi ta cu e militarnan responsabel pa e intento ta reclamando reestablecemento di orden democratico den e pais, cu otro palabra ta mira gobierno legalmente eligi di president Erdogan como no democratico. Den esey nan no ta para nan so, pasobra hopi ciudadano, a pesar di e mayoria cu ta para tras di Erdogan, tin miedo pa un regimen ‘democratico’ cu mas y mas ta violando derecho di ciudadano, ta purba silencia prensa liber y algun aña atras a uza e mesun forsa militar pa ataca y likida oposicion cu tabata concentra riba un di e plazanan principal di su capital. No ta mucho tempo pasa cu a aresta un periodista Hulandes di descendencia Turco pa loke e tabata publica na Hulanda di e situacion politico na Turkia. Un di e hopi señalnan cu gobierno di Erdogan no tin problema pa pone derechonan democratico un banda ora cu ta cumbini su interesnan.
Tur esaki ta suficiente pa organisa un golpi di estado, cu banda di su fracaso a costa bida di centenares di hende? Esey nunca. Forsa militar den un pais democratico ta pa defende pueblo y frontera contra forsa aheno, no pa ser uza contra pueblo mes. Mescos ta condena uzo di forsa militar awor pa purba deroca un gobierno eligi legalmente, tambe ta di condena cu e mesun gobierno aki a uza militar contra su mes hendenan. Cu e intento a fracasa anto ta bon noticia. Cu ciudadano a hunga un papel activo pa para e militarnan, ta un señal di accion civico admirabel. Mester bisa tambe cu e accion golpista tabata envolve solamente un parti chikito di e aparato militar, y tabata concentra mas bien riba e ciudadnan principal Ankara y Istanbul. No tin un claridad ainda tocante envolvimento di alto mando militar den e intento.
Cu tur esaki tur cos ta maraviyoso y Turkia por bolbe na su status quo di prome cu e intento? No, y e motibo principal ta cu e sucesonan aki a habri caminda pa mas represion contra tur hende cu Erdogan ta kere cu ta contra su maneho. Un prome señal ta e retiro di algun mil hues den henter e pais, habriendo caminda tambe pa e presidente nombra esnan di su gusto y cu ta sigui su ordennan. Grito inmediato pa reinstitucion di pena di morto ta otro señal cu cos ta bay den e direccion robes. Tin indicacion fuerte cu e gobierno aki, cu un mayoria popular solido su tras, lo bay comete mas atentado contra democracia cu talbes e militarnan tabatin pensa. Y cu tur esaki democracia no a sali gana y a aumenta solamente e posibilidad pa creacion di un dictadura, basa riba boluntad di pueblo. Ki ironia, nos por bisa.
Pero, te algun tempo pasa, nos no tabatin algo similar como bisiña? Y aunke den ultimo eleccion a mustra claramente cu pueblo Venezolano no kier tin mas un ‘dictadura di proletariado’ democraticamente eligi, e ta un realidad grandi cu e poder di e minoria Chavista ta basa awor riba forsa arma y Tribunal Supremo di Husticia. E ultimo aki ta uzando tur medio legal y ilegal pa para decisionnan di e Asamblea Nacional unda e oposicion a bira mayoria absoluto. Y mientras cu na Turkia e golpi di estado a bin di sorpresa, esun na Venezuela lo ta bon anticipa pasobra ta haci esey awor caba, y no sin motibo.
Venezuela ta yegando na culminacion di un caos den abastecemento di cuminda, medicamento y producto basico, cu ya a drenta e fase di sakeo di negoshi manera supermercado y botica. Ya caba forsa arma ta actuando contra nan mes pueblo. Por yega un momento cu e situacion ta bira asina urgente cu e militarnan ta tuma rienda completo den nan man. Dia nan haci esey, e prome declaracion cu nan lo emiti ta bisa cu nan a haci esey den nomber di democracia y pa salvaguardia democracia. Esey lo ta leu di ta berdad, na prome luga nan lo haci esey pasobra ta conveni nan mes. Dos tercera parti a vota pa otro gobierno civil, pero e militarnan ta bay respeta esey? Mas probabel ta cu e pais ta bay tin un regimen militar pa basta tempo; democracia a gana?
