Insiguridad riba mas cu 2.9 miljard florin; CFT: No por confia cu parlamento ta ehecuta nan derecho di presupuesto corectamente

Corsou su finanzas ta den un situacion precario. Asina CFT a declara, reaccionando riba e cuenta anual di 2017. E cifranan cu no ta corecto a yega te na un cantidad di 2.9 miljard florin.

Tanto Algemene Rekenkamer di Corsou, como Stichting Overheids Accountantsbureau (SOAB) tin dudanan grandi riba e cifranan financiero di e cuenta anual di 2017. Desde 2014 e finanzas di Corsou ta den un spiraal bayendo abou. Den 2014 ainda tabatin 40.4 miyon di surplus den e cuenta anual, mientras den 2015 e surplus a baha pa un 6.6 miyon, cabando den 2016 cu 3.1 miyon. A cera aña 2017 cu un deficit, cual ta riba papel ainda, di 116.8 miyon.

CFT a declara cu desde 2014 no tin mehoracion den e maneho financiero na e isla. Nan ta señala cu pa via di e falta di confiansa cu por tin pa e cifranan, e Parlamento no ta den estado pa ehecuta nan derecho di presupuesto corectamente.