Hopi ta esunnan den nos comunidad cu ta preocupa cu e problema di droga na Aruba. Responsabilidad di un gobierno ta pa educa e comunidad, pa medio di programanan preventivo, pa asina evita cu nos hobennan ta cay den adiccion.
“Bo ta puntra bo mes, con por ta posibel cu un gobierno ta permiti 8 aña pasa sin inverti riba tereno di salud mental?” Esaki ta expresion di Minister di Salud Publico, Dangui Oduber. “E ultimo investigacion haci riba consumo di droga y alcohol aki na Aruba tabata 20 aña pasa.”
Hopi cos a cambia durante 20 aña, y mirando tambe cu no tabatin ningun maneho pa 8 aña largo riba tereno di ‘verslavingszorg’, a dicidi di bin cu un investigacion pa asina nos sa unda nos ta para y pa por traha riba miho plannan preventivo, segun un comunicado di gobierno.
E investigacion aki ta enfoca riba e factornan di riesgo bou di hobennan pa desaroyo di adiccion na diferente substancianan. E investigacion aki lo tin un duracion di 6 luna y a base di e resultadonan lo bin cu maneho y intervencionnan mas specifico pa cu nos hobennan, pa asina traha na un manera preventivo pa evita cu nos hobennan ta cay den adiccion.
Esaki un biaha mas ta mustra cu e gobierno aki ta percura pa e ser humano ta central.
