Curaçao cu aanwijzing… Y Aruba cu…?

Manera tabata anticipa caba, e ultimo Conseho di Ministro di Reino prome cu reces a resulta den un ‘aanwijzing’ cu ta un instruccion pa cu maneho financiero di Curaçao. Simplemente bisa, e deficit grandi previsible mester keda reduci na un minimo, y gobierno di e isla mes por bay scoge kico pa haci. Basta e cumpli. Al menos, esey ta e idea su tras. Den practica lo por resulta mas dificil pa implementa e medidanan necesario, y esaki pa motibonan conoci.

Ora un pais tin un economia cu no ta crece, cierto medida di aumenta entrada ta resulta negativo. Esaki pasobra gobierno ta gara un parti mas grandi di e bolo nacional cu no ta crece. Esaki ta haci cu ta resta menos placa den economia pa consumo, cu na su turno ta causa cu entrada di gobierno, den forma di diferente impuesto, ta baha envez di subi. Menos placa pa gasta ta resulta den menos benta den comercio, cu ta significa menos entrada pa gobierno. Menos consumo ta haci importacion di producto bay atras, atrobe causando menos entrada pa caha di gobierno; menos en todo caso cu tabata anticipa a base di e porcentahe cu cual a hisa e tarifa di cierto impuesto o accijns.

Tur esaki no ta rocket science; esey gobierno Hulandes tambe sa. Nan contesta riba esaki ta cu nan ta bay yuda e isla con pa reactiva su economia y haci e aparato administrativo publico mas eficiente. Algo bastante necesario y cu no ta logra asina facil tampoco, sino ya caba gobierno di e isla mes lo a logra ‘jumpstart’ nan economia, cu ta den caida pa varios aña. Ta facil pa gobierno Hulandes bisa cu nan mester a tuma medida hopi tempo caba, pero den defensa di e gobierno actual mester bisa cu nan ta purba di ruim op escombro di e gobierno delincuente anterior. Aunke esey ta un observacion corecto y veridico, na ora di trece solucion esey no ta yuda. E problemanan ta keda mes grandi y mes hopi. Kico asina nan ta?

Curaçao ta lidia principalmente cu e caida di dos sector cu den pasado reciente tabata di suma importancia pa su economia; esey ta e refineria y sector financiero ‘offshore’. E prome aki ta den un fase dificil unda cu e actual operador Pdvsa ta e compania petrolero mas mal para na mundo, cu cero posibilidad pa continua como operador. E proceso di busca un partner confiable a keda pega, principalmente pa motibo di corupcion, probablemente esnan cu tabata pidi placa pa nan aprobacion no tin idea con nan a perhudica nan pais na e momento aki. E partner Venezolano ey lo por ta un opcion si bin un cambio politico faborable na e pais ey. Tambe esey lo yuda soluciona e problema di refugiado cu e isla tin, hopi mas cu e caso di Aruba, por ehemplo. Pero pa keda na e refineria, e situacion ta keda dificil den e sentido cu e isla no tin gas natural pa usa como combustible pa e refineria. Pdvsa a cuminsa traha riba un plan pa trece gas na e isla via tuberia, pero esey no a haya continuacion. Y sin acceso na gas awendia ta dificil pa opera un refineria cu un margen di ganashi, y esey manera tur otro negoshi ta primordial.

E sector financiero no tin perspectiva pa crece, talvez ni pa consolida loke tin. E control cu e paisnan di OECD kier haya riba e paisnan cu ta ofrece nan mes como ‘tax haven’ ta haci cu ningun di e paraisonan di tax den Caribe por pensa di tin un futuro basa solamente riba esey. Ta resta anto, mescos cu e resto di e region, pa tira tur cos riba turismo. Den esey e isla tin cierto potencial cu no ta explota completamente ainda, pero no por garantisa un crecemento espectacular tampoco. Di e manera aki, Curaçao ta obliga di purba contene su gastonan publico, simplemente pasobra no tin opcion di crecemento, y aumenta entrada sin crecemento, manera bisa anteriormente, no ta yuda, al contrario.

Pero, pa cambia e tema un poco, kico e manera cu Hulanda ta atende e asunto aki ta bisa di e manera cu ta bay atende nos asuntonan financiero proximamente? Si nos mira cu cerca nos bisiñanan ta tuma medida severo, nos por spera ‘handschoen di felpa’? Curaçao su debe publico ta bao di 50% di GDP, si nan tabata por a fia placa na grandi nan por sigur gasta mas cu nan tin pa varios aña prome nan yega na e situacion unda nan tabata un tempo, y unda nos ta awe: caminda pa 90% di debe… Pero no ta permiti nan haci esey, punto.

Si nos kier continua e comparacion, por bisa cu momentaneamente nos ta economicamente un poco miho para cu nos bisiñanan, sin embargo, un crecemento di apenas 1% real den e proximo añanan no ta duna margen pa celebra tampoco. Den e situacion aki ta inimaginable cu Hulanda ta bay bisa “boso kier ta riba boso mes, dal bay anto.” Manera un representante Hulandes a bisa algun aña pasa: “Ningun isla ta haya e oportunidad pa pone cara di Reino na berguensa na nivel financiero internacional. Prome cu esey sucede, ta interveni.”