Luigi Heredia, Gerente General di Costa Linda Beach Resort: “Problema di escasez di personal ta afecta operacion di hotel”

E problema di escasez di personal den hotelnan ta birando un problema pa turismo di Aruba. Esaki ta loke Bon Dia Aruba a haya di tende den un entrevista cu Luigi Heredia kende ta Gerente General di Costa Linda Beach Resort, y el a duna di conoce cu na e momentonan aki varios compania hotelero ta den e mesun situacion.

Heredia a splica cu aworaki e problema di falta di personal ta afecta e operacion di e hotel y cu e area mas afecta ta Front Desk y Housekeeping, pero tambe e parti di Supervision. E ta manifesta cu nan no por haya persona pa traha. Nan tin posicionnan habri como tres luna caba y pa motibo di esey, nan tin cu baha e nivel di atencion, loke no ta bon pa turismo. Asina mes, Heredia a expresa cu esey no ta pasa na Costa Linda Beach Resort so, tambe ta sosode den otro hotelnan.

Otro problema cu Heredia a señala ta cu muchanan cu ta gradua di scol no kier traha na hotel, no kier traha diferente shift, of den fin di siman. Segun Heredia, e ta pensa cu esey ta parti di e cultura nobo di e hobennan di awendia.

Pa loke ta trata e personal cu Costa Linda tin na e momentonan aki, Heredia a comenta cu nan ta conta cu personal di diferente nacionalidad, pero ciudadano local ta esun cu tin mas tempo trahando den e hotel, manera el a informa siman pasa ora nan a reconoce e trayectoria di nuebe persona cu tin entre 15 pa 25 aña trahando na Costa Linda Beach Resort.

Banda di e entrevista cu Heredia, Bon Dia Aruba a entrevista algun otro persona cu tin posicion di gerencia den hotel cu no ta desea di tin nan nomber menciona. Nan ta confirma e situacion como algo general di practicamente henter e sector, no solamente na nivel di Housekeeping, pero na otro nivel den hotel tambe.

Loke a bin dilanti den nan declaracionnan ta e preocupacion grandi pa futuro, tambe en bista di e cantidad grandi di camber di hotel cu ta planifica, mientras cu ya caba ta existi un escasez asina fuerte. For di e informacion demografico disponibel ya ta conoci cu den e proximo decada no lo tin un aumento di banda di hobennan cu ta gradua, pasobra e grupo ey, a base di menos nacemento, lo bira gradualmente mas chikito, independiente di cu nan lo desea di traha den hoteleria si of no. E unico alternativa cu ta keda ta e importacion di forsa laboral na un nivel mas amplio cu ta e caso actualmente.

NOTA di Redaccion: E tema aki sigur ta exigi mas profundisacion, tambe di banda di maneho gubernamental. Nos lo amplia mas riba esaki den e proximo tempo, tambe riba e alternativanan.