Ayera na Biblioteca Nacional di Aruba a tuma luga Expo Maker Aruba, un evento na unda e hendenan creativo a mustra loke nan por haci pa celebra e cultura e inspira otro hende cu unico fin di crea ‘bigger things’.
Christie Mettes, organisado di Expo Maker Aruba a comenta pa Bon Dia Aruba cu esaki ta un celebracion di tur e personanan cu ta traha den tecnica, cu ta traha nan mesun proyecto y a tuma e innovacion ‘den su man’; e personanan cu a participa ta desde mucha y hende grandi cu a traha cosnan hopi simpel pa siña cosnan avansa.
Mettes a comenta cu, durante aña cu a pasa, nan a colabora cu Futura Lab pa bin cu Brenchie’s Lab na Biblioteca Nacional y tambe Mob-Lab cu ta bishitando diferente scol siñando e muchanan y pa celebra e fin di aña escolar. Nan a dicidi di haci esey mas amplio pa wak con leu e proyectonan por bay.
Tambe Mettes a bisa cu tabatin proyecto cu Lego, Plastic Beach Parti tambe a participa, asina como tambe Mob-Lab y Futura, proyectonan cu innovacion cu ta haci cu e personanan por participa den dje. Tur presentador di e proyectonan ta activo tur aña, manera el a expresa: “Esaki ta algo cu ta pasa tur aña na EPI, Brenchie’s Lab y Space and Nature tambe tin actividadnan full henter aña”.
Darry Everol, di Space and Nature, un organisacion cu sede na Aruba y afilia na International Astronomical Union (IAU), a splica cu nan a presenta na Expo Maker Aruba pa mustra pa e publico cu nan t’ey y duna un splicacion riba e telescop di pa kico nan ta wordo uza y cua ta e diferencia entre nan. Asina mes, el a expresa cu nan ta trahando haciendo workshop y lesnan pa muchanan cu tin interes den esey y bay scolnan pa duna les.
Di otro banda, Danny Maduro boluntario di Scubble Bubbles a señala e importancia di e conservacion, preservacion y plantacion di coral na Aruba, nan ta busca luganan den isla cu tin coralnan morto, nan ta haci limpi y planta e coral cu klem, nan ta crece y multiplica nan mes y asina por haya especienan di pisca y tur e bidanan marino.
El a expresa cu desde 2016 nan a cuminsa cu e proyecto aki cu muchanan di 12 y 13 aña pa siña nan PADI pa motibo cu nan mester di cierto datonan pa planta e coral.
