Departamento di Mediador di Gobierno ta brindando su intermediacion pa keda cla cu e negociacion entre gerencia di hospital y sindicato ABV di e contracto colectivo (CAO) nobo pa mas di mil trahado.
E proceso pa yega na e CAO aki a cana slow pa varios rason; un di nan tin cu haci cu e problema cu a surgi entre dirigente di e sindicato y director di hospital, pero tambe a surgi e problema cu ainda hospital no tin un Director Financiero.
Bon Dia Aruba a acerca Mediador di Gobierno, Anselmo Pontilius, y el a declara cu e trabou cu sindicato pa tur esunnan envolvi yega na e CAO nobo ta uno ‘inmenso.’ Mester tene cuenta cu hospital, cu ta un di e dunadonan di trabou mas grandi, ta depende di un suma cu e instituto aki ta haya anualmente via nos seguro medico general AZV.
Pontilius ta haya cu e proceso aki ta canando y tin bastante progreso. Sinembargo, tabatin un stagnacion na momento cu e Director Financiero di hospital a wordo retira. Mientras tanto nan a logra supera e situacion aki, pero tin punto ainda cu mester sali afo; un tabatin di haci cu asunto di pensioen.
Tin otro punto cu tin di haci cu e orario di trabou cu hospital ta bin proponiendo pa e trahadonan riba e 55 aña di edad, etc; nan ta mas tanto puntonan operacional. Pero den general, pa loke ta trata puntonan financiero, ta spera cu por sali di dje den e proximo simannan, segun Mediador di Gobierno.
Pontilius a aclaria cu aunke hospital ta actualmente den proceso pa busca un Director Financiero nobo, esaki no ta stroba e negociacion di CAO. Hospital tin hendenan temporal cu ta trahando riba e parti financiero, y p’esey e haya cu esaki no por nifica niun obstaculo.
