E aña aki ya a pasa 6 luna cu autonan mester tin sticker di impuesto pega. For di inicio por a mira tur sorto di manera cu e sticker aki a wordo pega. Segun Alex Pieters di unidad di motor, un sticker mal poni por causa cu ta duna e persona un multa, cual a tuma luga tambe.
“Pa loke ta boet pa sticker mal poni of tint cu ta stroba, Ora hende tin nan sticker mal poni nos ta avisa nan pa siguiente biaha pa pone conforme ley. Mirando cu ta prome aña cu a aplica sticker y no tur hende a lesa a regla bon con pa pone. Ta tin varios bruhacion na comienso pero esey a wordo aclara, dus cu e sticker ta obliga. E ta un prueba di pago pa 2016 y tambe identificacion di e vehiculo, mescos cu e plachi number, p’esey tur dos mester ta presente riba e vehiculo. Tambe ta para den ley cu no mag di tin nada cu ta stroba e bista di e sticker, dus pa hende cu tin nan glas dilanti getint ( cual riba su mes ta prohibi pa tint e glas dilanti ) nan mester kit’e pa pone e sticker pa e ta obvio pa autoridad por wak e bon.” Segun Sr. Pieters ta splica, a duna algun boet caba pa esaki dus dos articulo,- pone tint riba glas dilanti y tambe pa stroba e bista di e sticker. “Nos falta pa haya feedback di ministerio publico pa cual ta e sanctie di e boet of si e persona a bay hues y kico lo tabata e sentencia.”
Color no ta facil pa mira
Pa loke te e color di e sticker: Riba un distancia e no ta facil pa wak e sticker, ni ki color e ta. “E manera di control ta, cu nos ta para e auto nan y pidi e chauffeur e documentonan cu e mester tin cu ne ora e ta maneha un vehiculo di motor riba caminda publico. Ora nos par’e y nos constata cu e no tin e sticker poni, (esaki riba su mes ta un boet caba) nos lo pidi pa e papel nan di belasting y controla via centrale post si e number ta paga. Si no ta asina, e lo haya boet pasobra e no tin belasting paga y boet pasobra e ta coriendo rond sin sticker riba e glas dilanti. Ora e polis ta coriendo riba caminda y controlando , e ora ey ta mas dificil pa wak e windshield dilanti lihe pa e sticker chikito si e tin e of no. Esaki ta e voordeel di e plachi number dilanti y patras cu ta mas obvio,” segun Sr. Pieters a splica.
Plachi di number 2015
Mirando cu e control ta enfoca aworaki riba e sticker y e numbernan poni riba e sticker, a puntra Sr. Pieters si esey kiermen cu aworaki personanan por kita e plachinan di number di 2015 for di nan auto. Sinembargo el a bisa cu esaki no mag. “No, no mag di kita e plachi number blauw cu blanco pasobra e ley ta papia di e combinacion di tur dos. Pues pa core riba caminda publico cu bo auto/ truck/bus ( motorcycle si tin nr model nobo ) bo mester tin e plachi di 2015 full paga cu e controle plaat riba dje anto esaki mester ta combina cu e sticker di e aña 2016 riba e glas dilanti.”
Segun ley: E plachi di 2015 ta keda valido y ta obliga pa tin esaki riba bo vehiculo di motor ( cu excepcion di motorcycle) y mester pega e sticker como prueba di pago 2016. Si bo cumpra e vehiculo nobo den aña 2016, ora di pago lo bo haya un plachi number di 2015 y un sticker di 2016 pa pone riba bo vehiculo.
Ley
Segun Regeling Kentekens Motorvoertuigen AB 2000 no.22 ( riba website di Aruba.gov ) na artikel 1 lid 3 ta bisa cu e sticker lo wordo pega parti paden di e glas dilanti banda drechi abou pero net riba esun di keuring, anto di tal forma cu e ta wordo mira obviamente.
E reglanan aki por wordo haya den Afkondigingsblad van Aruba 2015 no.57 ( tur e regla nan di kentekens riba vehiculo di motor ) e ministeriele regeling aki ta regla e color y tipo di e plachi number pa tur sorto di vehiculo. Tur aña esaki ta sali pa regla esun nobo di siguiente aña. Sr. Pieters a conclui bisando cu tur e leynan y cambio di ley por wordo haya riba e website di aruba.gov , ta importante pa bo sa bo ley/ derecho y obligacion!
