Iran a pasa e limite pa su reserva di uranio enrikeci, poni na 2015 pa su acuerdo nuclear cu podernan mundial, segun Tehran y inspectornan internacional a bisa dialuna, marcando su prome salida mayor for di e acuerdo, un aña despues cu Merca unilateralmente a retira su mes.
E anuncio di Minister di Exterior di Iran, Mohammad Javad Zarif, y despues confirmacion di e Supervisor Nuclear di Nacionnan Uni, ta pone presion nobo riba paisnan Europeo purbando di salba e acuerdo, entre e campaña maximalista di presidente Donald Trump, enfoca riba Iran.
Iran tambe ta menasa di aumenta su enrikecemento di uranio mas cerca di nivel di arma dia 7 di juli proximo, si Europa no ofrece un acuerdo nobo.
Esaki tambe ta eleva tension den Medio Oriente, net despues cu Iran recientemente a tira abou un drone di vigilancia Mericano, atakenan misterioso riba tankeronan cu Merca y Israel ta culpa riba Tehran, y atakenan cu bom riba drone di e rebeldenan Yemeni, cu sosten di Iran, na Saudi Arabia.
Union Europeo a urgi Iran pa reverti su decision, y prome minister Israeli, Benjamin Netanyahu a yama e accion ‘un stap significante na caminda pa un arma nuclear’. Iran a mantene cu su programa nuclear ta pa propositonan pacifico, a pesar di miedo occidental.
“Nos a anuncia esaki anteriormente, y nos a bisa transparentemente locual nos ta bay haci”, Zarif a bisa. “Nos ta bay actua di acuerdo cu locual nos a anuncia, y nos ta considera nos derecho reserva den e acuerdo nuclear.”
E organismo di control nuclear di Merca, Agencia Internacional di Energia Atomico, a bisa cu su director general a informa oficialnan cu a verifica dialuna cu Iran a surpasa e limite. Ni Zarif, ni agencia di Merca a bisa cuanto uranio e pais tin actualmente.
