Den ultimo añanan Caya Betico Croes miho conoci como Caya Grandi a haya varios problema cu a causa e caida di benta di e comerciantenan di e caya ey. Aruparking ta un di e problemanan cu cual nada a wordo haci despues cu gobierno a priminti un cambio den e sistema ey. Asina tambe e cantidad di persona cu ta biba riba caya como adicto cu ta causa molester y miedo na e mesun comerciantenan, cliente local of turista.
Bon Dia Aruba tabatin un entrevista cu Julio Badillo, doño di un auto cu a ser kima ayera pa un persona cu supuestamente ta un adicto cu ta biba riba caya. Badillo a splica cu ayera den oranan di mainta entre 7or y 7or y mey el a mira un homber cu tabata bringa y maltrata un muhe dilanti di su trabou, segun Badillo a manifesta, el a wak den direccion di e pareha y no a haci nada cu por a causa un molester pa e homber.
Minuutnan despues, Badillo a ricibi un yamada di su hefe cu a bisa cu su auto tabata na candela, y ora el a yega, el a mira tur e daño cu e candela a causa na su auto cu el a cumpra apenas tres luna pasa y cu te ainda e ta pagando, y cu e no sa si seguro lo cubri tur e daño. Un persona cu tabatin su auto para banda di esun di Badillom, a bisa cu el a mira un homber cu a cende e auto na candela y a core bay. E persona a sigura cu tabata e homber cu tabata pleita cu e muhe un rato prome.
E situacion aki a para bira normal den e sector ey, pa motibo cu tras di tienda La Moderna tin un edificio cu anteriormente tabata funciona como gym, pero aworaki ta e luga unda e adictonan ta biba y ta laba auto pa haya algo di placa.
Jennifer Vargas, cu tambe ta traha cu Julio Badillo a comenta cu e situacion cada dia ta birando mas dificil cu e personanan ey, pa motibo cu nan ta persona adicto na alcohol of otro substancia y nan ta biba riba caya pidiendo placa di hende cu ta pasa y cu ta haci compra; tambe cu un biaha algun persona a kibra e parti dilanti di e tienda y ta causa hopi daño na otro comerciante.
Esaki ta un situacion cu manera nan a splica “ta lamentabel” pa via cu segun nan Polis sa kico mester haci cu e personanan ey, pero dianan ta pasa y e situacion ta keda igual.
Un señora cu ta encarga cu un luga di cuminda, cu a pidi pa keda anonimo pa miedo di represalia, a expresa na Bon Dia Aruba cu durante dia tin biaha cu turistanan kier sinta pa come y disfruta di e luga, pero e personanan ey ta yega ey pa pidi placa y ta spanta hende. Tambe el a comenta cu benta no ta bay bon, el a purba keda habri te 10or di anochi, pero e otro comerciantenan ta cera mas tempran y e caya ta keda hopi solitario y peligroso.
Otro di e problemanan cu ta afecta e comerciantenan ta e parkinglot di Aruparking. Gobierno a sigura y priminti varios luna pasa cu nan lo busca un solucion pa e vaknan geel cu pa hopi biaha ta keda bashi. Manera e potret acompañante ta mustra tin basta luga geel cu no ta wordo uza y esey ta causa hopi molester na comunidad cu kier para nan auto cerca di Caya Grandi pero nan no ta haya luga.
