Ehercito di Nicaragua a captura diamars pasa dos ciudadano Egipcio y dos Iraki señala como supuesto integrante di e organisacion terorista di Estado Islamico (ISIS) ken nan tabata persigui pa paisnan bisiña cu e posibilidad cu nan lo por drenta na teritorio Mericano.
Di acuerdo cu un reporte di inteligencia di e Departamento di Siguridad Interior di e Gobierno di Merca, e grupo di presunto terorista tabata na Costa Rica e 9 di juni pasa y na Panama e 12 di mei.
Fin di siman, autoridadnan Mexicano a bati alarma di e posibilidad cu lo por drenta na Mexico cu intencion di drenta Merca via e frontera entre ambos pais.
Na october di 2018, durante e paso na Mexico di e prome caravana di migrante, presidente di Merca, Donald Trump, a alerta riba e presencia di integrantenan di ISIS entre e multitud, y tambe a sugeri cu e democrata a financia e campaña.
Na e ocasion aki, specialista y varios medio di comunicacion a descarta e afirmacion di Trump y nan a insisti cu tabata trata di un esfuerso di e presidente republicano pa influi den e eleccion di november di 2018.
E Egipcio Mohamed Ibrahim, di 33 aña, y Mahmoud Samy Eissa, di 26, asina como e Iraki Ahmed Ghanim Mohamed Al Jubury, di 41, y Mustafa Ali Mohamed Yaoob, di 29 a ser captura cerca di e frontera sur di Nicaragua, Polis local a informa diamars pasa.
E supuesto teroristanan ‘a drenta di manera ilegal desde Costa Rica, via e paso di frontera no habilita’, e autoridadnan Mexicano a indica.
Tanto e autoridadnan di Costa Rica como di Mexico a adverti di e presencia posibel di tres supuesto integrante di ISIS na Nicaragua diamars pasa.
