Minister Otmar Oduber tocante vehiculonan ATV, UTV y Quadracer: ‘Nos ta preparando un licencia cu por retira si no cumpli of faya’

Durante un conferencia di prensa cu Minister di Desaroyo Teritorial, Infrastructura y Medio Ambiente Otmar Oduber a ofrece dialuna pasa, el a papia tocante e preocupacion di e uzo di UTV, ATV y vehiculonan quadracer cu e turistanan ta uza, y cu den ultimo siman ta den luz negativo y a trece preocupacion riba e isla.

Oduber a splica cu den e tema aki no por generalisa cu tur hende, tur operador of turistanan cu ta uza e mashinnan aki nan ta haci algo robes, al contrario, Oduber a bisa cu esaki ta un grupo chikito di esunnan cu ta daña pa tur e otro. Pero e realidad ta cu nan tin un deber y responsabilidad pa loke ta trata siguridad den trafico, kico ta permisibel y kico no, y di otro banda ta e discusion den comunidad, cu ta e daño cu nan ta haciendo pa medio ambiente.

Oduber a bisa cu su ministerio ya caba for di cuminsamento di luna di mei a pidi un conseho for di Comision di Flora y Fauna, y dia 10 di juni pasa el a ricibi un conseho dirigi riba diferente departamento pa por duna un feedback necesario.

“E intencion no ta pa nos por molestia of perhudica e operacion di e vehiculonan aki riba caminda, pa motibo cu nan ta parti di e turismo y di e producto cu Aruba ta ofrece, pero mester cuminsa respeta e medio ambiente y siguridad den trafico y e calidad di bida di e comunidad”, Oduber a sigura.

Di mesun manera, el a comenta cu hunto cu Minister di Transporte, Chris Romero, for di basta tempo ta bezig cu diferente instancia pa por bin cu un maneho definitivo riba e uzo di e vehiculonan aki, y pone reglanan pa evita cu lo por causa daño na nos isla.

Tambe el a expresa cu a papia cu Minister di Turismo, Dangui Oduber, pa por trece un certificacion pa e operador di tour, y asina nan por haya un licencia pa e sorto di vehiculo aki, y asina, momento cu nan no ta cumpli of faya, por revoca nan licencia.

Asina mes, el a informa di un reunion cu a tuma luga cu habitantenan di area di San Fuego, cu despues cu e entrada Shete di Parke Nacional Arikok a ser cera y e ruta a cambia pa via cu e vehiculonan aki tabata causa pa e area di San Fuego, e siman aki nan lo percura pa e area haya asfalt na e caminda, y asina evita e daño y molestia cu tabata ocasiona.