Pastoor di Parokia Birgen di Fatima na Dakota, Rev. Daniel Wieslaw Szpila, a dirigi un Carta Habri pa Prome Minister di Aruba, y tambe pa Parlamento di Aruba. E ta bisa textualmente asina:
Carta habri
Na su Excelencia Prome Minister Mike Eman y na miembronan di Parlamento di Aruba.
Su Excelencia, apreciabel Parlamentarionan,
Consciente di e diferente presionnan cu boso por tin, pa locual ta e cambio den e legislacion di Codigo Civil di Aruba, mi ta apela na boso pa no decepciona e pueblo cu a scoge boso y a confia na boso e guia di e pais aki.
No perde for di bista cu e pueblo aki profundamente cristian nunca tabata intolerante, agresivo of discriminatorio y cu e sentimentonan aki no ta e base di su rechaso na e ley di “matrimonio” di e mesun sexo.
Mi mes persona a apela den medionan pa no humilia of menosprecia esnan cu tin inclinacion homosexual, locual no ta pertenece na nos conducta cristian. Nunca nos por acepta pica, pero nunca nos por ofende e pecador.
E base di nos rechaso na tal ley, ta e Ley di Dios (Gn 19, 4-13; Rm 1, 26-28.32; 1Cor 6, 9-10; 1Tm 9-10), como tambe e temor pa e consecuencianan moral pa nos pueblo, si e cambio ey lo sosode.
Nos ta spera di boso e altura di dignidad, pa no promulga nunca ningun ley cu lo contradeci leynan di Dios, kende boso mes ta reconoce como Señor den boso fe.
Solamente respet na Decalogo y na Palabra di Dios, lo haci nos un pueblo digno di respet. Atentando contra esey, lo destrui fundeshi mes di nos cas comun, cu lo basha riba nos den un caos, anto e ora ey si, lo bin arogancia y confusion, intolerancia y desprecio, manera e paisnan unda a haci esey ta demostra caba.
Permiti nos biba como rumannan den harmonia cu otro. Esaki lo ta posibel solamente, ora lo opone na e exigencianan extravagante, cu na un manera legal ke destrui e orden moral di nos pueblo, como prome paso, pa despues exigi otronan mas, locual tambe ta conoci caba di observacion di otro parti di mundo.
No laga boso autoridad mes devalua den bista di boso pueblo, aprobando como ley, locual hasta e Tribunal di Derechonan Humano di Europa a desconoce como derecho.
Mi ta pidi Spirito Santo pa duna boso e don di sabiduria y don di fortaleza y pa e drama su bendicion pa henter nos pueblo, tambe pa esnan cu ignorando su lei ainda ta dwaal, por haya un dia e luz di berdad.
Atentamente,
Daniel Wieslaw Szpila
Pastoor di Parokia Birgen di Fatima, Dakota.
