Riba e suma di 60 mil no ta paga belasting. Riba loke cu resta, e ora ta calcula 0.4% cu ta e tarifa di grondbelasting. Esaki ta loke cu vocero di Servicio di Impuesto, Meverly Romano a cuminsa splica. Esaki ta e balor total di loke cu tin na tereno, na cas of cualkier otro edificio, como dispensacion. Ley ta stipula tambe cu e balor di propiedad ta keda stipula cada cinco aña. Awor ta den e periodo di cinco aña cu ta core di 2012 pa 2016. Una bes cu e balor di propiedad cu a stipula na 2012 t’ey, no ta bay cambia esey durante cinco aña.
E ta keda asina ey pa cinco aña largo. Awo na 2016, e cliente ta hay’e cu un aanslag cu mester menciona, cu e mesun balor di propiedad cu e tabata tin den su cobransa di 2012. Por sosode si cu tin cambio y ki ora ta haya cambio. Ta haya cambio ora cu e cliente bende un propiedad durante aña of a cumpra un propiedad acerca. Of e balor di su propiedad a baha pasobra algo a sosode.
Por ehempel su cas a wordo destrui pa mal tempo of el a wordo destrui pa candela. E ora ta haya cu tin situacionnan cu ta causa cu e balor di un propiedad, sea cu e ta baha of e ta hisa. Un hende por haci un bijbouw tambe riba su cas. E por a pone un pool tambe na su propiedad. Tur eseynan ta factornan cu ta aumenta e balor, of bo ta haya factornan cu hustamente ta baha e balor di un propiedad y esey por sosode durante aña. Ora esey ta e caso, e ora ta haya un cambio den e balor total di propiedad cu ta aparece riba e cobransa.
Na e momentonan aki loke cu Romano ta recomenda clientenan pa controla e cobransa bon, lesa e texto cu tin imprimi riba e cobransa, pasobra Grondbelasting tin otro terminonan di pago. Grondbelasting tin otro rekisitonan, cual ta otro compara cu Impuesto di entrada. Ta bon pa si e cliente no ta compronde algo, e acudi na departamento di Impuesto.
E ta pidi un cita cu un funcionario cu ta atende cu Grondbelasting. Si e tin un desacuerdo riba e cobransa, e tin su derecho pa dentro di 2 luna desde e fecha di cobransa e haci un obhecion. E ta entrega un carta di obhecion. Na e momentonan aki tur carta di obhecion cu drenta nan ta na tempo. Esaki ta e momento, pero si un cliente ta bin bisa cu e ta haci obhecion pasobra e ta haya cu e suma di e balor of e balor di e propiedad ta mucho halto, e tin cu motiva su obhecion si.
Romano a splica cu ta stipula e balornan pa cinco aña, manera ya indica.
Si na 2012, e persona ta oke cu e balor, na 2016, e balor ta mesun cos. Si tin un caso particular a sosode, manera candela, of algo, e balor no ta mesun cos, e mantencion di e cas ta asina malo cu e cas su balor no ta mesun cos. Ta hopi bon pa e cliente motiva den su carta, mas tanto posibel pakico e ta haya cu e cobransa ta mucho halto. Asina eynan hopi biaha ta pidi tambe e cliente si e por tin un rapport di balor di e propiedad cu no ta mas bieu cu tres aña. Ta pidi esey tambe un comprobante di seguro di candela, ta pidi tambe e mapa di cas, pa por saca afo mas of menos kico ta e balor real y si ta un caso cu por a sosode cu por ehempel tabata tin mantencion malo of e cas a keda destrui pa candela, e ora por bay tambe na e sitio pa bay evalua un ke otro. Esey ta sosode den e fase di obhecion (bezwaar). Pero loke cu e cliente mester sa ta cu e tin su derecho pa haci obhecion. E tin derecho tambe no solamente pa haci obhecion, pero si e kier mas informacion e por acudi na departamento di Impuesto, pa por dun’e mas informacion riba su aanslag, Romano a splica.
