Cu orguyo Serlimar ta anuncia cu nos Upcycle Center Serlimar pronto lo habri su portanan pa e comunidad di Aruba. Despues di un trayecto largo di un aña caminda diferente investigacionnan a tuma luga, a logra structura e proyecto aki den un centro total cu lo ta dedica na procesonan creativo y educativo relaciona cu “upcycling” y “recycling” di diferente tipo di material.

Serlimar lo traha conhuntamente cu organisacionnan local entre otro; Fundacion Pa Nos Comunidad, ArteSano, Luna Foundation y Mondiero, cu tin experticio den cuadro di procesonan di reciclahe. Cada un di e organisacion aki lo traha conhuntamente cu Serlimar riba un of mas tipo di material cu e obhetivo pa re-uza, recicla y “upcycle” esakinan. E meta principal ta pa duna e materialnan cu ta wordo colecta den e centro un di dos bida pa nan por sigui wordo uza.

E materialnan cu lo wordo acepta den nos Upcycle Center Serlimar ta; plastic, aluminium, papel, carton, caha, paña, sapato, cos di hunga, buki, palet y mueblenan bieu. E materialnan aki lo haya un otro bida y proposito despues cu nan caba di wordo recicla. Un di e prioridadnan di nos Upcycle Center pa cu e materialnan aki ta cu nan mester ta limpi y den bon condicion conforme cu e reglanan stipula pa e centro aki. E reglanan stipula a wordo implementa pa asina preveni cu lo bay ricibi materialnan kibra y sushi cu lo por atrae bestia den nos hal y alabes cu no lo ta di e calidad pa wordo recicla. Tur material cu yega na nos Upcycle Center lo wordo controla prome cu wordo descarga pa e personal di e centro.

Upcycle Center Serlimar lo ta habri su portanan pa e comunidad dia 12 di juli 2019 y lo ta habri entre 9’or di mainta te cu 7’or di anochi di dialuna pa diabierna, y ariba diasabra di 9’or di mainta pa 1’or di merdia. Comunidad di Aruba henter ta invita pa bin experiencia nos Upcycle Center Serlimar dia 12 di juli 2019. Bin experiencia y wak con creativo nos organisacionnan local por ta cu materialnan cu ta reciclabel y re-uzabel.

Pa mas informacion di nos Upcycle Center Serlimar por tuma contacto cu Serlimar na 5245080.