Durante un conferencia di prensa cu minister di Comunicacion, Transporte y Sector Primario, Chris Romero, a ofrece pa e medionan local, el a papia tocante algun cambionan cu Arubus lo bay tin den e lunanan aki.
Romero a duna di conoce cu e compania tin un director nobo, cual ta Edwin Mohamed, kende tambe a traha cu gobierno anterior, y el a compromete pa bin cu un era nobo pa Arubus.
Di mesun manera el a informa cu siman pasa, su persona hunto cu consehero y director di Arubus, a realisa un biahe pa Sao Paulo na Brasil, eynan nan tabatin un reunion cu e compania cu ta fabrica bus.
Romero a manifesta cu na e biahe di trabou ey, nan a bay bishita Mascarello y Volkswagen, e marcanan di e bus cu ta biniendo na Aruba proximamente, pa asina trece un era nobo cu Arubus lo tin, hunto cu cambionan grandi no solamente cu e fleta, sino cu e servicio cu nan lo brinda pa e comunidad.
Romero a bisa cu pa fin di luna di juni lo cuminsa yega na Aruba ocho bus, cu lo brinda un miho servicio, cu WiFi y airco. E meta ta cu pa final di aña, comunidad lo tin 30 bus nobo. Ademas el a expresa cu e idea ta pa cambia e flota completo.
Despues di e reunion cu e companianan Mascarello y Volkswagen, Romero a sigura cu nan a crea un relacion pa asina brinda pa Arubus e tecniconan y duna conocemento pa e personal por drecha y haci mantencion.
Romero a comenta cu mediante e busnan aki, nan kier baha e gastonan substancial di Arubus, ya cu e compania tin gastonan astronomico, manera cu pais mester subsidia esaki.
“E busnan nobo lo cambia e cara di Arubus”, asina Romero a señala, y a informa cu lo bay ta visibel den oranan di anochi, y tambe tin diferente aspecto pa e siguridad di e usuario di e busnan aki.
