Director di SVB, Edwin Jacobs, a splica tocante entrega di relato pa ministernan dia 28 mei, conforme artikel 16 di ley di SVB, punto anual di fondo pa administracion di SVB. Tambe a entrega pa prome biaha un relato anual di tur loke a pasa den SVB na 2018.
Nan a haci uzo di ocasion pa entrega e documento den forma digital, pa asina enfatisa e transformacion cu SVB ta pasando aden actualmente. “Nos ta ehecutando nos vision 2020, caminda ta transforma nos organisacion burocratico pa uno moderno y digitalisa. Esaki ta riba caminda pa implementa.”
Segun Jacobs, na 2018 ta mira un aña positivo, unda tin punto cu mester atencion y poco preocupacion. E ta continua splica cu den comunidad tin expectativa pa sa kico ta resultado pa fondo di AOV, ‘esey ta fondo mas importante’ cu SVB ta maneha, ‘pensionado ta depende di esaki’.
Aña pasa SVB a cera final cu 21.345 pensionado di cual 90% ta biba na Aruba, 7% ta biba na Hulanda, 2% ta biba den isla Antiano, y 1% na otro parti di mundo. Jacobs ta bisa cu si compara cu 2017, tin 18 pensionado menos na 2018.
“Na 2018, gobierno a paga cu un total di 27.700.000 florin den reparatietoeslag na nos grandinan, unda cu 25.800.000 florin tabata pensionado di biehes y 1.900.000 florin tabata pensionado viudo of huerfano”, Jacobs a splica.
Pa locual ta trata e prima di departamento di impuesto, cu ta esun cu ta colecta prima di seguro di AOV y AWW, nan a mira cu aña pasa den comienso tabata tin atraso den cobramento, unda cu a sinta cu departamento di impuesto pa yega na un cooperacion y colaboracion, unda nan a cera cu 2.2% ‘mas na prima cu 2017’.
Un total di 286.900.000 florin cu departamento di impuesto a colecta pa seguro di AOV y AWW, ‘tur esaki den un balans’. Jacobs ta expresa cu por mira resultado pa fondo di pension di biehes ta uno positivo di 17.100.000fl y pensioen pa viudo y huerfano ta di 5.000.000 florin.
Esey ta nifica reserva ta e parti importante den fondo di pensioen di biehes, despues di reforma cu ta pasando den dje y ta aumentando tur aña. “E intencion ta cu economia ta draai bon y nos saca loke nos tin cu saca for di economia, y pone den un reserva pa aña 2025 padilanti, caminda nos proyeccion ta mustra cu ta mas hopi cu entrada.”
Sinembargo, lo bay tin un reserva cu lo saca pa asina cubri deficit tanten busca un solucion pa situacion cu ta presenta ora di desbalansa. E reserva final di 2018 tabata un total di 46.000.000 florin, esaki ta recupera e 2 luna di pago di AOV y AWW pensioen.
Na e momento aki, Jacobs ta bisa cu ta pagando un promedio di AOV y AWW di 21.500.000 florin, ta ricibiendo mas cu esey na prima, dunando resultado positivo tambe. Sinembargo, mas reserva tin, miho prepara ta bay ta ora di atende cu situacion presenta cu no por evita.
“Si nos wak e proyeccion pa futuro, saliendo di crecemento economico basta conservativo y manteniendo pension su balor di poder di compra, nos ta yega na 2027. Segun e proyeccion, gasto lo ta mas halto cu entrada”, Jacobs a splica.
Na e momento cu esey sosode, ta bay tin un deficit, anto lo mester cuminsa saca di e fondo di reserva. Sinembargo, si no ta logra manera ta proyecta, e ora resultado lo bira 2028-2030. Si tin mas entrada na fondo ricibi, lo ta miho prepara pa enfrenta e momento cu resultado por ta negativo.
Na 2036 ta spera cu e reserva lo caba, y e momento ey mester tin un solucion. Den segundo mita di 2020 ariba tin cu bay atende cu un desbalansa pa futuro generacion, pa asina ta riba bon caminda. 20.000 pensionado ta depende di esaki, y tin cu mustra ta riba bon caminda tambe.
Pa e prome kwartaal di aña 2019, e cantidad di pensionado a aumenta cu 152 persona. E coleccion di prima di e prome 3 luna a bay bon, segun Jacobs. Nan a conoce un aumento compara cu aña pasa di 12.6%. Pa pensioen di biehes a resulta positivo di 4.400.000 florin. Di viudo y huerfano, 800.000 florin, tambe proyeccion cu resultado positivo pa final di aña.
