Despues di reunion di IPKO: Dia 2 di juli lo trata propuesta di Ley di Reino pa Areglo di Disputa

Pa dia 20 di juni awor, e delegacion di parlamentario di Aruba, caminda Juan Thijsen ta bay como presidente di parlamento, lo participa den e reunion inter- parlamentario di Reino (IPKO) na Hulanda.

Hunto cu e parlamentarionan di Corsou, St. Maarten y Hulanda, e delegacion di Aruba integra pa cuater parlamentario di e fraccion di MEP, cuater di AVP, un parlamentario di POR y tambe RED cu un parlamentario, lo ta debatiendo riba e parti di Statuut.

Presidente di parlamento, Juan Thijsen a declara cu despues di IPKO nan tin e propuesta di Ley di Reino pa Areglo di Disputa of voorstel Rijkswet Geschillenregeling ta wordo trata, si tur cos bay bon, dia 2 di juli. Thijsen a cualifica e echo aki ‘como algo historico.’

Despues di 9 aña, paisnan di Reino a yega asina leu pa bay trata e propuesta di ley di Reino. Presidente di parlamento a bisa cu Aruba sigur ta prepara pa un amienda cu nan ta bay entrega. Parlamentarionan di Aruba por ta presente como delegadonan special.

El a splica cu ‘a base di Statuut nos mag di entrega amienda y mocionnan. E unico cos cu nos no por haci ta vota’. Pero segun Thijsen, nan a haci lobby y papia cu nan coleganan na Hulanda y convence nan riba e importancia di nan amienda. E amienda aki ta busca di trece cambio riba e voorstel Rijkswet Geschillenregeling, ‘cu nos ta kere cu lo bay duna e solucion cu Aruba ta buscado pa casi un decada caba’.

Den su declaracion pa e matutino aki, presidente di parlamento a mustra su mes hopi positivo, y logicamente nan mester haci nan parti pa logra e cambio aki. “Mi por bisa bo, cu positivismo nos ta bay pa Hulanda pa nos por logra esaki,”el a bisa.

Esaki ta e manera pa den Reino por tin mas trankilidad, pa medio di un organo cu por husga ora paisnan di Reino tin un diferencia di interpretacion ora nan ta bin cu un articulo di Status. E ta considera relevante pa bin cu un instancia independiente den Reino cu por bisa ken tin rason ora cu ta surgi un disputa. Te awor e no ta asina y –segun Thijsen– esaki ta perhudica Aruba hopi y tambe e relacion den Reino. E ta kere cu e amienda aki lo trece un solucion y ‘asina nos por tin mas trankilidad y husticia den Reino’.

Tambe riba nan agenda lo tin cierto puntonan ariba e tereno di salubridad publico y tambe lo trata cierto puntonan di e Sustainable Development Goals di Nacionnan Uni y como paisnan di Reino nan mester sigui cada un di nan.