Conseho di minister di Reino (Rijksministerraad) a pospone e emision di un aanwijzing (instruccion) pa Corsou. E isla su gobierno tin 3 siman pa preveni cu e aanwijzing ta bin bek riba mesa.

Prome minister Eugene Rhuggenaath a acorda cu secretario di estado di relacionnan di Reino Raymond Knops cu Corsou lo haya 3 siman pa convence politica na Den Haag cu no ta necesario pa bin cu medidanan drastico por medio di e aanwijzing pa asina tene finanzas publico bou control riba e isla.

Esaki ta e resultado sorprendente despues di un reunion cu a dura mas cu un ora entre ambos partido. Ora e reunion di conseho di minister di Reino a sali, Knops y Rhuggenaath a haci un declaracion en conhunto. No ta conoci te na momentonan actual cual tabata e rason cu Hulanda a acorda pa tene e aanwijzing na man un rato prome cu core ehecut’e.

Knops a splica cu ta sumamente importante pa finanzas riba Corsou bira stabiel. Pero e no un problema cu un solo banda. Tin varios factor, manera e echo cu gobernacionnan anterior no a pone finanzas como prioridad y a laga e situacion empeora mas y mas despues di tempo, ademas di e crisis cu tin andando na pais bisiña Venezuela. Sinembargo siguramente ta importante pa considera cu e maneho y supervision riba finanzas ta importante, tanto di banda di entrada como riba gasto, e situacion lo tin cu cambia.

Conseho di minister kier analisa prome, ‘wak problema seriamente’
E secretario encarga cu relacionnan di Reino a expresa cu Hulanda kier studia e problema ‘seriamente’ , cual a conduci na e decision pa no emiti e aanwijzing y wak con leu ta yega den proximo 3 siman, te proximo conseho di minister di Reino.

Knops a splica cu nan lo kier sigui desaroya nan acuerdonan pa yega na algo mas concreto. Esaki mirando cu specialmente mester tene na cuenta stimula economia.

“Nos lo bay wak con Hulanda, cu tur su departamentonan lo por asisti den traha un plan pa bin na e efecto desea. Awo ta importante pa no wak e ley (Rijkswet) manera cu e ta, si no pa wak e y bisa: kico ta necesario pa laga Corsou haci e cosnan corecto? Esey ta nos tarea conhunto. Nos relacion ta bon pues mi no ta duda cu nos lo por yega na dje.”

Premier Rhuggenaath di su banda a duna danki na conseho di minister di Reino pa brinda Corsou e espacio cu tin mester pa asina conhuntamente trece sanacion pa aparato gubernamental y na mes momento crece economia. “Nos tin nos propio responsabilidad riba e aspecto di nos autonomia, sinembargo nos relacion cu Hulanda ta bon. Mi no ta duda cu nos lo logra cu apoyo di Hulanda.”

Organo di supervision a conseha pa bin cu un aanwijzing. Pero e decision definitivo ta keda den man di conseho di minister di Reino, cual lo reuni atrobe riba 5 di juli. Na e momento ey lo determina con ta sigui.