E sindicatonan Brasileño a tene un convocatorio pa un welga general cu protestanan na tur e pais pa ayera contra e reforma di pensioen di e presidente Jair Bolsonaro, aunke e proyecto cu a yega te Congreso tabatin algun polemica.
E modificacion ‘no ta cambia nada’, segun e presidente di e Central Unico di Trahadonan (CUT), Vagner Freitas a conta prensa.
“CUT no ta concorda cu e pensamento cu e pensioen lo ta e problema economico principal di Brasil. E problema di Brasil ta cu no tin un proyecto di politica economico”, el a indica.
Durante prome oranan di mainta, Folha a publica cu e welga general ta afecta e transporte na Sao Paulo y el a destaca cu tabatin protestanan y ceramento di caminda durante marduga. Di otro banda, O Globo a publica cu na Rio di Janeiro servicio ta operando manera normal.
Practicamente henter e sector industrial gigantesco a bini hunto pa e welga, maske lo mester wak con uni e trahadonan den sector di transporte ta, mirando cu autoridad a duna di conoce cu e servicio aki ta obligatorio na Sao Paolo.
E welga a tuma luga despues di dos manifestacion grandi di studiante y docente 15 y 30 di mei, contra e blokeo di presupuesto pa enseñansa.
Ademas e movemento a cuminsa riba prome dia di inauguracion di Copa America ayera nochi cu e partido Brasil-Bolivia na stadion paulista di Morumbi.
