Ainda presupuesto no a bay Raad van Advies!
E prome señalnan di un proximo confrontacion entre gobierno di Aruba y gobierno di Reino a cuminsa soma cabes atrobe. E choke ta concerni e presupuesto 2016 cu te awor ainda no a bira conoci den su forma definitivo, te pa e cuminsa cana su trayectorio legal. E caminda aki a bira un poco mas complica despues di e introduccion di e ley riba CAFT, pasobra mester incorpora e momentonan cu e organismo aki mester haci su trabao dunando su opinion.
E ley nobo ta prescribi cu CAFT ta conseha e ministro di Financia dentro di dos siman despues di ricibi e proyecto di ley. E mesun articulo (10) ta stipula tambe cu si conseho a ser duna, anto e proyecto di ley ta bay pa Parlamento acompaña pa e conseho, mientras cu den su Memoria di Splicacion mester indica te con leu y con a tene cuenta cu e conseho. Esaki ta implica tambe cu Raad van Advies mester haya e proyecto di ley, plus e conseho di CAFT pa e por haci su trabao debidamente.
E problema crea awor ta cu gobierno a haya ta bon pa saca un version preliminar di e presupuesto, consistiendo di e cifranan y un ‘speerpuntennota’. Riba esaki CAFT a reacciona dunando un opinion preliminar observando algun cos cu nan ta señala awor caba, pero cu nan lo ta pendiente di e version definitivo di e presupuesto, pa e ora ey duna nan veredicto final. Anto e ora ey tur cos por bay pa Raad van Advies, pa nan haya duna nan conseho, pa gobierno contesta, y pa finalmente tur documento keda ofreci na Parlamento, pa tratamento…
Nos ta awor caba na fin di october, y si nos ta kere cu tin full luna di november y december ainda, nos ta mal kiboca. Segun e ley di CAFT, pa mas tarda 15 di december CAFT mester ricibi un ley di presupuesto aproba. Si esey no ta e caso, anto tampoco no tin un bista cu por haya ainda un ley aproba, o un proyecto di ley sikiera riba un termino rasonabel, e ora CAFT lo mester pone gobierno di Reino na altura di e situacion. E situacion naturalmente ta cu Aruba lo ta violando Constitucion atrobe pasobra no a percura pa aña habri cu un presupuesto aproba pa e aña ey.
Si tabatin un presupuesto completo pa bay Raad van Advies awe, ta pasobra a cana e caminda caba di duna CAFT e documento pa duna nan conseho, pa inclui esaki den loke ta bay pa Raad van Advies. Nos no a tende nada di esey. Pa mas tempran anto Raad van Advies ta bay haya e pakete na mita di november, pasobra CAFT mester haya ainda e presupuesto definitivo pa nan conseha ariba, cual ta tuma dos siman. Despues Conseho Consultativo ta bay conseha, loke por tuma tres siman. Esey ta pone nos caba den prome siman di december! E bon ta cu Parlamento no mester costa hopi tempo, pasobra ya e presidencia di e organismo aki tin amplio experiencia den con pasa documento den Parlamento na velocidad halto. Cu de paso nan ta viola derecho di oposicion, y di pueblo, riba un tratamento debido, no lo ta nan preocupacion mayor. Mirando e bista riba e proceso con e por tuma luga, por bisa cu por logra ainda, basta ta actua awor mes. Pero, tin otro problema.
Un di e problemanan ta, entre otro, cu CAFT den su comentario preliminar ta señala cu, entre otro, nan ta mira cu gobierno no tin plan di ataca e asunto di baha gasto di personal na un manera contundente, y por lo tanto no ta cumpliendo cu e compromiso cu nan mes a pone riba papel den e plan di autorisacion te cu 2018. Tin poni pa corta Afl. 90 miyon na 2016 segun CAFT, y nan lo desea di mira e detayenan di con gobierno ta bay realisa esaki. Naturalmente no ta dificil pa imagina cu gobierno no tin ningun plan pa bay corta di e manera aki, y aparentemente esey ta un di e batayanan cu ta tumando luga tras di cortina na e momento aki. No ta solamente e tardansa tecnico ta hunga un papel, sino tambe con yega na acuerdo kico pa haci. Pasobra e ley di CAFT ta stipula cu, tambe despues cu e ley keda aproba, si e no ta na agrado di CAFT, keto bay nan por recomenda gobierno di Reino pa interveni pa pone straight loke nan ta haya krom. Den e ley ta papia di un ‘aanwijzing’ cu gobierno di Reino por duna, pero no un na Gobernador, pero na gobierno mes.
Si no bin un acuerdo pronto tocante presupuesto 2016, ta warda nos otro confrontacion entre e dos gobiernonan. Aña pasa caba nos a haya sa cual tin mas poder. Y e biaha aki si gobierno di Reino no ta bay dal cu e palo di basora (Gobernador), pero por saca e bate di baseball (Algemene Maatregel van Rijksbestuur).
