Dialuna mainta den conferencia di prensa, prome ministro Evelyn Wever-Croes a splica tocante e situacion na Venezuela unda cu por a mira cu fin di siman otro boto cu persona ‘ilegal a drenta, y ken sa kico mas’.

El a expresa cu a pesar di e esfuerso cu ta haciendo no ta suficiente y ta pone cu nan lo por intensiva esfuerso. “E crisis no ta di Venezuela mas, ni region pero un crisis mundial y den comunidad. Nos na Aruba ta haciendo nos parti pero ta un reto grandi.

Segun e mandatario lo papia cu marina real pa yega na un acuerdo cu un protocol entre polis y marina real pa asina cera frontera completamente mirando e acto ilegal cu ta tumando luga ‘esaki no ta locual nos kier na Aruba’. Nos mester trankilidad y siguridad.

El a reuni cu premier di Hulanda, Mark Rutte y secretario general di asunto interior, Raymond Knops, tambe cu Eerste y Tweede Kamer, pa nan scucha e impacto di e crisis na Aruba. E mandatario a expresa cu na reunion di Union Europeo ta tuma decision pa loke ta trata sancion, pero nan no ta sinti e impacto cu ‘nos ta sinti akinan’. Sinembargo, e reunion ‘a bay bon y tur a tende loke mi tabatin di bisa’.

E peticion cu prome ministro a haci pa atende cu e impacto, nan informa cu tin 23.800.000 euro den e presupuesto pa atende cu esaki. “Nos a bay busca informacion di esaki. Nos ta den proceso pa entrega e lista di cosnan cu nos tin mester pa haci Aruba mas sigur. Entre otro, mas radar, vigilancia, mas hende y boto pa controla nos costa miho.”

Tambe pa locual ta trata e asistencia di proceso di asilo politico, e mandatario a splica cu tin 1,000 peticion di asilo na Aruba. Agregando cu ta algo cu mester wordo trata segun procedura internacional stipula.

Pa haci esey nan mester di hende cu capacidad y entrenamento. Tampoco cu e 23.800.000 euro lo ricibi den cash. Hulanda lo ‘cuantifica den kico nan ta bay yuda nos sea kustwacht, boto hende’. Den procedura di asilo y migracion tur esey envolvi den e gasto. E placa ta pa aspecto di logistica, proteccion di frontera, procedura pa respet pa derecho humano.

Nan lo wak di e manera structural con nan lo introduci e lista aki. “Sea den efecto den enseñansa, salubridad den cuido di persona, vacunacion. Pensando riba husticia, pa extende e capacidad mirando cu Guarda Nos Costa ta chikito.”

Sinembargo e mandatario a aclara cu no lo crea vivienda of cosnan pa cualkier persona cu ta bati na porta pidiendo asilo. El a expresa cu mester manera pa ‘fortifica’ pa haci Aruba mas sigur y asina por atende cu crisis.

Wever- Croes a bisa cu pasobra impacto ta grando, no ta mira un solucion pronto. Organisacion di estado Americano lo tin fin di luna un plenario na Colombia, unda cu lo papia di e crisis. Aruba y Corsou ta inclui pa esaki. Segun a mandatario a expresa cu nan tin comprension di loke ta pasando, y ta spera cu lo por yuda cu fondo.

Mirando e situacion delicado, e mandatario ta bisa pa comunidad keda cu pasenshi, pa sa cu gobierno tin atencion y ta pendiente riba esaki. “Cu tur frustracion a tuma nota cu toch un boto por a drenta nos costa, sin cu a wordo detecta”, e mandatario a comenta.

Pa finalisa, Wever-Croes a bisa cu siguiente paso ta yega na protocol cu Marina Real, pa asina percura pa e costa ta mas protegi. El a expresa cu ta e costa ta un punto vulnerabel, sinembargo mester pone cabes hunto pa sigura esaki.