E brugnan na frontera entre e estado Venezolano di Tachira y e departamento Colombiano di Nort di Santander, a habri bek diasabra pasa pa e paso di peaton, tal como gobierno di Nicolas Maduro a anuncia.
Desde ayera cu solo a sali, autoridadnan di Venezuela ta permiti e circulacion fronteriso di miles di persona, cu den su mayoria ta carga of lastra maleta, y ta dirigi na e ciudad Colombiano di Cucuta, segun a constata na e brug internacional Simon Bolivar, e principal di cuater brug cu ta comunica Tachira cu e Nort di Santander.
Entre 5.000 y 7.000 persona a drenta Colombia den e prome tres ora di apertura di e frontera, segun Migracion Colombia a confirma.
Diabierna pasa den oranan di anochi, Maduro a ordena e reapertura di e pasonan na e frontera entre e dos region, cu a ser cera for di 22 di februari ultimo, un dia prome cu Juan Guaido, reconoci como presidente encarga di Venezuela pa varios pais, a purba sin exito di drenta na e frontera cu ayudo humanitario pa alivia e escasez di alimento y medicina.
Cu e medida aki, oranan prome cu solo a sali, miles di persona tabata na espera na e banda di Venezuela pa e reapertura di e Simon Bolivar, pa pasa pa Cucuta pa adkiri productonan basico of pa emigra di e pais.
Aunke e paso di peatonnan a habri,e circulacion di autonan no ta permiti, y e brugnan ta sigui blokia cu e containernan cu Gobierno Venezolano a atravesa na februari, pa impedi e paso di e ayudo humanitario for di Colombia.
