‘Como un gran siman’ na Aruba, caminda nan a adkiri hopi conocemento y inspiracion, asina presidente di e comision local di Acuaril 2019 (Association of Caribbean University, Research and Institucional Libraries) y directora di Biblioteca Nacional di Aruba (BNA), Astrid Britten, a cualifica e di 49 conferencia di Acuril cu a culmina diahuebs anochi na Renaissance Convention Center.
Un siman di hopi enseñansa y compartimento, unda a wordo reforsa pa e bibliotecarionan y tur esunnan envolvi den e mundo aki, pa no perde e ‘toke humano’, independiente di e exito di nan institucionnan. Igualmente den su mensahe di despedida, Britten a haci un yamada pa nan permanece semper uni y sigui traha na bienestar di medio ambiente.
Britten a laga sa cu e presidente di Acuril (2018-2019), Monique Alberts, ta esun cu a propone un gran tema: “Acceso y Oportunidad pa Tur.” Esaki den cuadro di e Sustainable Development Goals (SDG’s) di Nacionnan Uni, cu a inspira e conferencia cu a caba di tuma luga riba nos isla. E ta un tema cu ta uni mas e miembronan di Acuril pa sigui traha hunto pa logra e metanan aki conhuntamente, el a indica.
E di 50 conferencia di Acuril lo tuma luga na Bahamas na aña 2020. Britten a probecha pa bisa cu ‘for di e happy island di Aruba, nos lo biaha pa e bunita Bahamas e aña venidero.’ El a probecha pa expresa su gradicimento na tur esunnan cu a haci posibel e realisacion di e conferencia di Acuaril na Aruba. Tambe esunnan cu a forma parti di e comision local di Acuril y e parti logistico y tecnico cu a haci posibel e organisacion y exito di e conferencia aki.
Logicamente Britten a manifesta su profundo gradicimento na minister di enseñansa, Armando (Rudy) Lampe y gobierno di Aruba, pa nan sosten. Igualmente nan a duna reconocimento di aprecio na e comision ehecutivo di Acuril y tur hende envolvi den e conferencia aki.
