Diabierna merdia, organisadonan di Soul Beach Music Festival (SBMF) a publica un post riba nan pagina oficial di Facebook cu a genera hopi reaccion. E texto, principalmente ta pa gradici tur esunnan cu a asisti e aña aki, pero tambe ta menciona cu pronto lo haci anuncio di informacion y destinacion.

Esaki a sorprende hopi persona cu a asumi cu e festival musical lo sigui tin Aruba como sede, mescos cu tabata e caso pa ultimo 19 aña. Un reaccion di parti di organisadonan di SBMF of for di representantenan di Aruba Tourism Authority no tabata posibel pa ciere di e edicion aki, sin embargo, ta spera cu pa den transcurso di fin di siman lo por obtene mas informacion relaciona cu esaki.

Soul Beach Music Festival ta un di e eventonan internacional den e kalender anual di Aruba, cu mas ta atrae hende pa bishita nos isla. Diferente miembronan di sector turistico ta wak su mes beneficia pa e cantidad di fanatico, di segmento Afroamericano cu ta bin Aruba pa conoce y gosa durante e dianan liber conoci na Merca como ‘Memorial Day Weekend.’ Segun un comunicado di prensa di Ministerio di Turismo, cifranan presenta dor di e organisadornan di SBMF na ATA, ta indica cu na 2017, e evento a percura pa 5500 bishitante, mientras cu na 2018 e cantidad a aumenta na 6000 turista y e ultimo edicion, celebra dos siman pasa, a registra e cifra record di 6500 bishitante.

“Danki pa haci SBMF 2019 nos miho ana te cu awo! Keda pendiente pa e 20 aniversario. Anuncionan di informacion y destinacion ta bin pronto! Nos ta aprecia boso sosten!” Asina e imagen publica ayera riba e pagina di FB Soul Beach Music Festival, ta bisa. Den apenas e prome oranan, el a wordo comparti varios biaha. Den e comentarionan por mira un di e pagina mes cu ta bisa: “Hi SBMF Fam! Nos lo bay haci e anuncio di e destinacion pronto!” hunto cu e emoticon di un curazon geel.

Mientras tanto e reaccionnan no a keda atras y fanaticonan di e festival musical a cuminsa puntra si ta otro isla e evento ta bay, pa, entre otro, nan cuminsa plania nan biahe. Tin cu ta lamenta hopi ora di pensa cu SBMF ta bayendo for di Aruba. Un ‘top fan’ di e pagina Tawanna Reese a comenta ‘Mi kier pa e keda na Aruba.” Juls Brown, di su banda a skirbi den e post cu a keda comparti den un grupo di fanatico riba Facebook: “Aruba or nah go. Mi ta traha mi mesun Soul Beach na Aruba” y su tras “Nos ta bin pasobra e ta na Aruba! What the…”. Otronan a pone gifs di yoramento, otro a conta di otro festivalnan cu despues di a cambia di luga, no a lanta cabes mas.