Ayera durante un conferencia di prensa cu minister di husticia Andin Bikker a ofrece na media local, a informa cu despues di un procedura di solicitud cu a wordo conduci door di Veiligheidsdienst Aruba (VDA), Ministerio Publico y Den Haag, nan a haya e consehonan y nan a nombra Gino Winklaar, inspector di polis, como e director nobo di Korrektie Instituut Aruba (KIA) pa un tempo di dos aña.
Minister tambe a bisa cu e conseho lo bay tin un ekipo di sosten, consistiendo di Sergio Quandt y dr. Aro Verschuur, cu ta bay ta den e team pa sostene e servicio di ehecucion nobo di KIA.
Un di metanan cu minister a comenta cu su ministerio tin, ta cu nan lo kier yega na un instituto penitenciario nobo, pa motibo cu mester tin facilidad nobo. E facilidad actual tin su retonan y tin cu actualisa e edificio, cu ta mas di 30 aña bieu, y den diferente rapport, ta haya cu mester mehora e infrastructura, y esey ta un di e prioridad cu ministerio tin.
Di mesun manera, Bikker a duna di conoce cu nan a intercambia cu Hulanda un memorandum cu tambe ta wak e retonan di loke ta trata Aruba, Sint Martin y Corsou, cu tambe tin retonan similar pa loke ta trata infrastructura penitenciario.
Mientras tanto, nan ta drecha e edificio actual mas cu por ta posibel, bou e retonan financiero, pa pronto lo tin e facilidad nobo y un vision pa e tema aki cu no a haya atencion, segun minister a sigura.
Gino Winklaar, kende tambe tabata presente den e conferencia, a expresa su gradicimento pa por forma parti di cambio nobo cu ta bin pa KIA. El a bisa cu na luna di juli casi 19 aña pasa el a drenta den servicio di gobierno, y a duna danki na Quandt y dr. Verschuur pa nan apoyo, cu hunto cu nan lo purba di hiba e instituto na un nivel mas halto, y conhuntamente cu e instituto nobo, cu lo bin proximamente.
