Congreso Peruano, controla pa oposicion, a vota diaranson pasa na fabor di e mocion di confiansa cu e Poder Ehecutivo a presenta, un victoria politico importante pa e presidente Martin Vizcarra, cu a haya e apoyo pa su reforma anti corupcion.
‘77 congresista a vota na fabor, 44 den contra y tres a abstene, cual ta nifica cu ta aproba e mocion di confiansa’, e presidente di e Congreso Daniel Salaverry a bisa ora el a duna e resultado.
E resultado faborabel pa Vizcarra, ken ta carece di partido y plataforma, a causa sorpresa pa motibo cu tabata spera un votacion mas dificil.
E votacion a cera cu un sesion prolonga cu a dura mas di 15 ora entre diamars y diaranson, despues di e mocion di confiansa realisa pa e presidente di e conseho di ministernan, Salvador del Solar.
Del Solar a sostene cu e norma proponi pa Vizcarra ta busca pa caba cu un custumber di e politica local cu ta consisti cu poderoso companianan di construccion lo financia campaña ‘cu e obhetivo di garantisa contractnan cu ta termina den miles di miyon di obranan paralisa’.
E tabata papia di e compania constructor Odebrecht, cu na 2016 a admiti di paga soborno miyonario pa haya contractnan di obranan di infrastructura na Latino America.
E investigacionnan anti corupcion na Peru ta inclui tur e ex-presidentenan cu a goberna desde 2001 te cu 2018. Tur di nan ta bou sospecha di tin vinculo corupto cu Odebrecht.
E iniciativa legislativo cu Vizcarra ta busca aproba ta un cu ta busca e inmunidad parlamentario pa lo por retira na e Corte Supremo, otro pa cu e personanan cu a ser condena no lo por ta candidato mas y di tres cu cualkier Peruano lo por participa den eleccion di candidato na primario interno di partido.
