E pais a pone mas cu 300 persona bou observacion, despues cu un homber di 23 aña a wordo diagnostica cu virus Nipah, un malesa straño y mayoria di biaha mortal.
Autoridadnan sur di India, na e pueblo di Kerala, a bisa cu a identifica como 311 persona cu a bay den contacto cu e homber, y 4 otro persona ta mustrando e mesun sintoma di e malesa. Tur ta bou di observacion y a wordo bisa cu no mag sali for di cas.
E virus ta bolbe aparece un aña despues cu el a mata 17 persona. Oficial di Kerala ta bisa cu a tuma accion inmediato pa isola, observa y trata cualkier persona cu a ta den contacto cu e virus.
Ministro di salud, K.K. Shailaja, a bisa cu e homber ta den hospital den un condicion stabiel, pero isola. El a bisa den un conferencia di prensa cu otro 4, incluyendo dos zuster cu a trata cu e pashent, a cuminsa mustra sintoma di keintura, y tambe ta bou observacion y isolacion, pero no ta oficial cu nan tin e virus.
“Mi ta pidi comunidad di Kerala pa mantene calma y evita panico”, Shailaja a bisa. Nipah ta un virus ‘zoonotico’ cu e ta wordo transmiti di bestia pa humano, y su porcentahe di morto ta 40 te cu 75%. Un infeccion di Nipah por mustra 0 sintoma, of por causa encephalitis fatal (inflamacion na e cerebro).
Segun centro di malesa, control y prevencion ta bisa cu sintoma di Nipah na cuminsamento ta inclui dolor di cabes y dreymento di cabes. Pashent por bay den coma den algun dia. E virus a wordo yama pa e pueblo di Kampung Sungai Nipah na Malaysia, unda criadonan di porco a contrae e malesa.
