Minister Otmar Oduber: Gobierno ta aplasa cambio den recibo cu 3 pa 6 luna

Durante un conferencia di prensa minister Oduber, a duna di conoce cu e y minister Bikker tabata tin un reunion cu Camara di Comercio pa asina atende diferente preocupacionnan y asina splica e situacion financiero cu e pais Aruba ta den na e momentonan aki.

Minister Oduber a informa cu na aña 2017 nan a haya un deficit di 130 miyon den e presupuesto di 2018, el a bisa cu awendia nan por mira kico a pasa por ehempel cu e refineria. Manera minister Oduber a sigura, e gobierno anterior a hinca e pais den presupuesto pa tapa buraconan cu tabata ficticio den e sentido cu nan a pone den presupuesto un suma di 70 miyon di florin cu nan a haya door di e traspaso di e propiedad cu tur e stacion di gasolin, cu e tempo ey tabata trata e distribucion di gasolin na Aruba, segun minister e suma di 70 miyon aki nan a hinca den e presupuesto di 2017, pero nan no a pone bek den e presupuesto di aña 2018.

Tambe el a afirma cu nan a hinca den presupuesto un contract cu Citgo cu Aruba mester ricibi 20 miyon di florin pa aña, pero den ultimo 14 luna e gobierno no a wordo paga ningun florin.

Di mesun manera el a expresa cu den e reunion nan a tuma e decision di extende ponemento di BBO y tur e impuestonan riba e recibo pa tres of seis luna mas mirando cu e ta un cambio cu a purba di dosifica di Camara di Comercio.

Pa loke ta trata salario minimo cu a subi 3%, nan a splica pa Camara di Comercio cu si nan lo kier cambia e ley of si nan kier cambia e formula, esey ta algo cu nan mester pensa pa bay den direccion ey, pero mientras e formula cu ta wordo calcula pa loke ta trata salario minimo ta ser haci pa e ley cu ta prescribi esaki y mester cumpli cu ne .

Otro puntonan cu a bin dilanti den e reunion, minister Oduber a manifesta cu desde maart Serlimar a cuminsa cobra pa loke ta trata e servicio pa e comunidad mediante e ley existente y na luna di juni oficialmente e facturanan ta sali conforme cu e ley pa tur cas na Aruba y esey lo sali un biaha pa aña na luna di juni y asina duna e oportunidad pa asina ciudadanonan por paga manera nan escoge.