Cu fila largo direccion di lama y extra ruta di trein, Hulanda a experencia oficialmente su prome dia tropico pa aña 2019. Riba diadomingo 2 di juni, pa 3.50pm a midi e temperatura di 30 grado celcius na e municipio di De Bilt na e provincia di Utrecht. E temperatura aki alabes ta crea un record nobo como e di 2 di juni mas cayente cu a ser midi. E record prome tabata 29,5 grado Celcius, cual a ser midi na aña 1947.
Segun e fuente nos.nl ta raporta, e temperatura di De Bilt no tabata esun mas cayente cu a wordo midi. Na e municipio di Volkel na Brabant a midi 32,2 grado Celcius. Pa loke ta e sobra di e pais, a experencia generalmente un temperatura promedio di 28 grado Celcius. Tambe e rayonan di solo tabata poco mas fuerte cu normal. E asina yama ‘uv-index’ tabata alrededor di 7, cual ta haci cu un persona ya por a sinti kemadura dentro di 15 minuut.
E tipo di temperatura aki no ta inusual pa un comienso di juni, segun e fuente Weerplaza. Riba 7 di juni 1996 a keda midi na Volkel e grado di 34,8 Celcius.
Pues mirando e clima tropico aki, e comunidad Hulandes a sali disfruta di un dia na lama. Un di e lamanan popular pa bishita ta esun na Scheveningen. Door di e cantida di persona, a pone banchinan disponibel pa mucha, na unda riba dje tin number di telefon di nan mayornan. Di e moa ey, si cualke mucha perde den e multitud, por localisanan mas lihe.
Polis di entre otro Utrecht a haci e peticion pa tur hende tene calmo y pa alabes tin pasenshi pa asina un y tur por disfruta di e clima tropico.
Potret ta cortestia di nos.nl.
