Un grupo di mas cu 900 persona cu a haya un pre-reservacion a acudi na Directie Infrastructuur en Planning (DIP) su evento informativo diaranson ultimo pa haya informacion tocante con e proceso di pidi un tereno erfpacht ta bay. Di e 13 mil peticion cu tabatin habri, a baha esaki na 8 mil cu e maneho di First In First Out (FIFO).
E evento aki segun director di DIP ta esun mas grandi cu nan a yega di convoca, mirando cu tambe ta trata varios periodo di peticionnan entrega: 2005, 2006 y 2007. Tabatin institucionnan financiero tambe disponibel pa duna informacion na publico of traha cita pa peticionarionan por sigura cu nan lo haya nan pre-reservacion.
Minister di infrastructura y medio ambiente Otmar Oduber a declara durante su discurso cu ‘e maneho ta bon defini actualmente, pues ta keda na solamente bo persona si bo ta haya un tereno erfpacht of no’.
Maneho
E maneho cu ta ehecutando actualmente ta encera cu ta haci un screening prome cu dicidi si un peticion ta pasa pa e proceso di pre-reservacion. Aki por pensa por ehempel riba establece si e peticionario ta inscribi na Aruba actualmente of si el a haya tereno caba y si ta casa, si su casa tin tereno caba. Ademas e manera di traha ta duna prioridad riba peticionnan cu tin mas tempo ta warda, uzando e metodo di FIFO.
Sr. Croes como director a splica cu e manera di traha aki ta hopi mas transparente cu antes ‘pasobra bo sa unda bo ta para’. Esaki compara cu ora DIP tabata duna preferencia na cierto peticionnan. “Hopi biaha nan tabata traha selectivo. Ora mi a drenta mi a spanta pasobra bo ta wak cu tabatin peticionnan di aña 1992, 2003 cu a keda pendiente pero hende di 2007 si a haya tereno.”
Traha selectivo
Un di e casonan aki ta di Rina Hernandez, kende a haci un peticion pa tereno erfpacht na 2005. Den 2017 el a haya un yamada di DIP pa acudi na DIP tocante su peticion. Ora el a yega na DIP nan a informa su persona cu e no ta bin na remarca pa e tereno erfpacht pasobra e no tin firma liber.
Sinembargo segun director di DIP e regla aki no ta fiha ‘te cu ami sa’. “Den e ley di erfpacht no ta haci diferencia na nada, kico bo status ta. Unico exigencia ta cu bo ta residencia na Aruba. Anto p’esey bo ta ripara cu nos no ta selecta. Kiermen esunnan cu ta haci nan peticion e ta bay. Nos ta cleaning up. Nos no ta sinta wak ken bo ta pasobra e ora ey bo no ta caba.”
Despues di haya un carta di pre-reservacion e persona en cuestion tin 30 dia unda nan por acudi na DIP cu un carta di un institucion financiero. E maneho completo por haya riba dip.aw.
‘Tin suficiente tereno pa proximo 10 aña pero mester cuminsa construi vertical’
Durante e evento a pone un enfasis riba e echo cu Aruba cu e poblacion cu e tin actualmente, no lo por zorg pa cada persona individualmente haya un tereno pa construi vivienda den e manera tradicional. Tanto minister Oduber como director Croes a splica cu pa e crecemento di populacion proyecta, mester bay cuminsa construi bay ariba, pasobra e teritorio cu Aruba tin disponibel ta limita. Esaki claro lo mester bin cu un cambio den mentalidad, segun sr. Croes.
