Pa prome biaha e trahadonan di e compania Garage Cordia ta haya representacion sindical. Diaranson ultimo durante un referendum cu a tuma luga na oficina di mediador di gobierno, sindicato FTA a logra e mayoria di voto pa representa e trahadonan di e compania local di benta di automobil.
Mediado di gobierno, Anselmo Pontilius a declara na Bon Dia Aruba cu e referendum aki a ser solicita pa FTA y e proceso a cana su caminda legal. Un total di 53 trahado excluyendo miembronan di gerencia tabatin derecho di voto. Di e 53 trahadonan aki e mayoria a bini, caminda 43 a haci uzo di e derecho aki: 39 a vota pa FTA y 4 a vota pa niun sindicato. Esaki ta nifica cu FTA a haya e mayoria segun e ley di referendum di e 50% plus un di e trahado.
Unabes a conoci e resultado, mediador di gobierno ta considera importante pa e dunado di trabou cu e sindicato por sinta na mesa mas pronto posibel pa atende cu e preocupacion di e trahadonan. Nan a compronde di FTA cu e trahadonan a expresa varios preocupacion tocante e desaroyo di e compania. Di otro banda segun nos ley, e sindicato cu ta gana e referendum ta haya e derecho pa negosha e contracto colectivo (CAO) cu e condicionnan di trabou den dje.
Semper mediador tin e compromiso pa reuni cu e dos partidonan, ya sea separa of conhuntamente y percura cu nan por haya informacion necesario. El a laga sa cu semper mediador di gobierno ta purba di convence e compania y e sindicato pa preveni of evita e proceso largo, y pa yega na un acuerdo mutuo. Den e caso esaki no a wordo logra y e compania a prefera di scoge pa bay via un referendum.
