Un aspecto tin di haber cu e actividad di pelea di gay ta, si e ta legal of no. Segun Mario “Mayon” Arends, kende ta autor di e buki Pelea di Gai na Aruba e actividad di gayero ta algo ‘bedoogen’. Kiermen cu nos autoridadnan no ta contra dje, pero nan ta acept’e.

Esaki ta para te hasta den articulo di ley prome cu Status Aparte, aunke a bin adaptacion despues. Sinembargo den su buki, e ta cita un parti di e ley di 1990 No. 44, relaciona cu e actividad di gayero y di otro actividad, (Articulo 1-a). E ta un actividad cu ta keda na dispensacion si of no di e ministerio di husticia pa otorga permiso y cumpli cu otro permiso como bendemento di alcohol y cuminda, etc.. E ta trece e informacion corecto aki den su buki pa asina tur gayero por cria y cuida nan gaynan na manera decente. Sin cu nan tin mester di sconde of realisa evento cu presion di intrankilidad.

“Tur hende sa unda e ta pero niun hende ta papia di dje,” el a bisa. Te hasta tabatin hendenan cu no tabata di acuerdo pa Mayon bin cu un buki tocante gayero. Pero e ta convenci cu mester kibra e taboe aki, ya cu nos ta bibando otro tempo compra cu esunnan prome. “Awendia bo mester ta mas habri. Bo mester acepta cosnan manera e ta,” el a bisa. Arends no descarta cu por tin comentario positivo of negativo, y e ta habri y disponibel pa scucha nan tambe. Intencion di Mayon ta di habri un discusion sano tambe.

No tur cos ta negativo
E ta haya cu tin hendenan ta papia cosnan negativo rond di e actividad aki, pasobra nan no tin informacion. Arends a bisa cu no mester mira e parti negativo, ya cu e tradicion aki tin su parti positivo tambe. Te hasta pa aspecto di siguridad, nunca bo ta wak tanto security guard den un gayero, manera bo ta wak den otro tipo di actividad deportivo, farandula, etc..

Den su buki, Mayon ta trece dilanti loke el a yega di pasa aden, pero tambe buscando informacion bibliografico cu a keda publica tocante gayero no solo na Aruba sino den Caribe y Latino America, enter otro na Colombia y Venezuela. E gremio di e gayeronan tin un dicho cu ta wordo uza for di tempo cu e Spañonan a bin establece e tradicion aki den nos region, e ta bisa: La gallería es el deporte de los caballeros.

E ta bisa cu gayero, cu ta un palabra cu ta wordo uza entre otro pa referi na un persona cu ta cria gay, su palabra tin balor y respet. Y esun cu no ta cumpli cu su palabra lo keda marca pa semper. E ta algo cu ainda a keda di e tradicion aki, caminda awendia ni si bo tin firma algo dilanti notario, ta wordo respeta. Ora cu un pelea di gay caba, e referi mes ta trece e placa pa esun doño di e gay cu a gana, y ‘punto.’