Dialuna venidero parlamento di Aruba ta trata adaptacion di e ley (LAft), cu ta regula supervision financiero di Reino riba presupuesto di gobierno di Aruba y ta priminti di bira algo polemico. E proyecto di ley, manera entrega pa e actual gabinete, ta encera basicamente e cambionan acorda den e protocol firma entre Aruba y Hulanda na november aña pasa.

E ley mester a pasa parlamento caba prome cu fin di aña, segun acuerdo, pero gobierno di Aruba no a logra esey. Mester a haci algun adaptacion prome cu e version final por a bay Raad van Advies pa nan conseho obligatorio. Pero ta aparece awor otro menasa pa un tratamento rapido den parlamento, y esey ta cu sigur e fraccion mas grandi cu ta apoya gobierno, segun su lider di fraccion, Rocco Tjong, no ta di acuerdo cu no a inclui cambionan cu lo a haci e ley nobo uno cu lo ta conforme constitucion di Aruba, segun nan opinion.

Ta señala cu mester tin e posibilidad pa adapta e ley di tal forma, cu e ta keda conforme cu constitucion. Te na ciere di edicion redaccion di Bon Dia Aruba no por a haya un indicacion den ki direccion e amienda lo bay.

Den conseho cu Raad van Advies a duna recientemente riba e proyecto di cambio di ley aki a indica – atrobe – algun aspecto cu no ta cuadra ni cu Statuut, ni cu constitucion di Aruba, pero ta asunto cu mester keda regla den un ley di Reino, o un Algemene Maatregel van Rijksbestuur, pasobra ta trata di facultad y/o obligacion cu ta concerni entidadnan pafo di e teritorio di Aruba y por lo tanto no por keda regla den e actual ley (LAft); aunke e actual ley tin aspecto cu en berdad tin e mesun fayo aki.

Otro punto conflictivo ta e inclusion di un cambio cu ta haci posibel pa ex mandatario y ex politico bira miembro di e colegio di supervision (CAft). Esaki a keda palabra entre gobierno di Aruba y di Hulanda pa ‘remedia’ e situacion actual, unda cu e ex ministro Henk Kamp a bira miembro di CAft pa Hulanda, mientras e ley actual no ta permiti esey. Mester bisa si cu si aproba e cambio di ley aki, ta habri e posibilidad pa ex politico o mandatario di Aruba tambe bira miembro. En todo caso, gabinete a aproba e cambio aki pa inclui esaki den e proyecto, pero ta topa awor oposicion di nan propio fraccion den parlamento.

Ademas, si e ley finalmente no haya aprobacion di conseho di ministro di Reino, por sigui un ‘aanwijzing’ (instruccion) na gobierno di Aruba pa bolbe trece un cambio di ley den parlamento.

Di tur manera ta parce di bira un debate interesante dialuna awor, 9:00or di mainta den sala di parlamento.