Reglanan di maneho ta wordo stipula pa Minister of hefe di departamento. Nan ta pa regla asuntonan cu no ta regla detayadamente den un ley di rango mas halto. E ley di rango mas halto por podera Minister of e director pa traha un ley di rango mas abou of bin cu un maneho. E reglanan/decisionnan aki no por regla asuntonan cu ley no ta permiti of e ley mes ta regla. Taxista Blanca Orman, kende ta forma parti di e grupo di taxistanan cu no ta di acuerdo cu e cambio cu Minister di Transporte Otmar Oduber ta haciendo, kier pa tur hende sa mas riba e reglanan di Maneho.
E decreto ministerial (DM) (ministriële beschikking (MB)di dia 26 di mei 2016) no ta un ley; e ta un maneho di Minister, esta con e ta pensa di hiba su maneho riba e asuntonan describi den e decreto, con tal cu e maneho no ta contra ley. E Minister por cambia su maneho manera e ta desea. Un otro Minister cu e cartera di Transporte of Gobierno mes tambe por bin cu otro maneho. Maneho ta varia y por wordo adapta segun e situacion presenta. Minister no por cambia e ley si esaki no ta duna su persona e autorisacion pa haci cambio, of bin cu detayenan. Si e cambionan of detayenan ta contra e ley, nan ta nulo.
E Decreto Ministerial 26 di mei, 2016
Den e Decreto Ministerial (DM) Minister ta considera e siguiente Articulonan di e Decreto Nacional “ personenvervoer” (AB 1995 no. GT 23).
Articulo 1, pero aki no ta menciona nada cu Minister mester/por regla.
Articulo 3, ta bisa solamente cu Minister ta otorga e permiso, pues firma; no pone condicion.
Articulo 10, ta bisa cu por pone condicion na e permiso, pero no ta bisa cu Minister ta esun autorisa pa pone condicion.
Articulo 11 inciso 1, ta duna Minister e autorisacion pa permiti e doño di e permiso bou su responsabilidad, laga un chauffeur, siendo den su servicio (relacion di trabou), yuda su persona.
Articulo 11 inciso 2, tambe ta bisa cu Minister por duna permiso na un otro pa temporalmente actua como chauffeur di e vehiculo na beneficio di e doño di e permiso. Aki e ley no ta bisa cu minister of un tercer (Commissie personenvervoer of Departamento di Transporte Publico) ta nombra e chauffeur temporal aki, pero si cu ta e vehiculo (TX … o B … ) aki ta wordo uza. E Minister por keda sin aproba e peticion pero mester duna bon argumentacion pakico e no ta duna e permiso ey.
Articulo 11 inciso 3, ta stipula cu den caso di Articulonan 15 inciso 1 y 17 inciso 2 Minister por desvia di Articulo 7 inciso 3.
Articulo 15, aki e Minister ta nombra e dokter cu tin di declara cu e chauffeur ta incapaz pa maneha e taxi/autobus. Si e doño di permiso ta permanentemente incapaz pa explota e permiso (=traha como chauffeur di taxi/autobus), Minister, riba peticion di e doño di e permiso, por transferi e permiso riba nomber di un miembro di famia, si e doño di e permiso tabata soru pa mantencion of yuda den mantencion di e famia. (Minister no por nenga e transferencia, solamente e por pone condicion na e
operacion di e taxi/autobus).
Articulo 15 inciso 2, ta stipula cu na e transferencia por pone otro of condicionnan adicional (no na e permiso mes).
Articulo 16 inciso 2, ta stipula cu na renobacion di e permiso (pa taxi o autobus) por pone otro of condicionnan adicional (naturalmente nan no por ta contra e ley).
Di e Decreto Nacional “personenvervoer” ( Lb AB 1997 no. GT 4) ta wordo menciona:
Articulo 18 inciso 3, ta stipula cu den autobus mester tin un lista cu stempel di Gobierno di e tarifanan menciona den e Articulo aki; pasaheronan mester por lesa e lista. No ta Minister ta fiha e tarifanan.
Articulo 21 inciso 7, ta exigi di e doño di permiso pa, a base di un modelo fiha pa Minister, mustra cua ta e number di taxi y con a yega na e tarifa. E tarifanan no ta wordo fiha pa Minister.
Articulonan 5, 6 y 7 di e ley (Lv AB 1995 no. GT 23) ta duna e procedura y exigencianan pa peticion y otorgamento di un permiso di taxi y autobus.
Articulo 7 inciso 3, ta stipula cu e permiso ta wordo otorga si e solicitante mes ta e chauffeur di e autobus of taxi y cu core (opera) e autobus/taxi lo ta su principal medio di existencia/entrada.
Den Articulo 15 di e ley ta para cu riba peticion e permiso por wordo transferi.
1. Den caso di fayecimento di e doño di permiso;
2. Den caso di problema serio di salud cu e doño permanentemente no por
explota e permiso;
3. E explotacion di e permiso ta necesario pa mantencion di e famia;
4. E doño di permiso tabata esun cu ta cria o yuda cria e famia.
E transferencia por wordo haci riba nomber di un miembro di famia.
E peticion ta wordo haci pa e doño di permiso of un miembro di famia of herederonan. Si Minister nenga e peticion pa transferencia, e mester argumenta su decision. Contra e decision aki e interesado(nan) por bay den apelacion na LAR.
Loke ta para den Articulo 2 di e Decreto Ministerial di 26 di mei, 2016 ta contra e ley, pues ta nulo.
Ademas, stipulando cu tur peticion pa transferencia segun e Articulo 15 ta wordo nenga, ta kita tur posibilidad pa apela un decision negativo di Minister; esaki probablemente no por den ley administrativo. Un decision di Minister pa nenga un peticion di transferencia mester tin basenan solido. Argumentonan cu e mester uza, mester por ta menciona den ley y no por ta na su escogencia o discrecion. Argumentonan cu Minister mester uza ta:
Articulo 12:
1. Segun e Minister e solicitante no ta cumpli cu Articulo 7 inciso 1 of 2, of lo no por cumpli cu inciso 3;
2. Segun e Minister ya tin suficiente oferta den e servicio cu e solicitante kier ofrece;
3. E solicitante no ta duna e informacionnan corecto.
Articulo 13:
1. Segun e Minister ya tin suficiente oferta riba e trayecto pidi;
2. E solicitante ya ta den posicion di un permiso.
Interes general of siguridad nacional semper por ta un argumento, aunke no ta para den ley, pero si e Minister mester por demostra esaki na e solicitante of doño di permiso.
Referiendo na e Articulo 15 di Lv ta lanta e pregunta pakico lo no transferi e permiso si e doño di permiso no ta mantene famia, pero pa motibo di su incapacidad permanente e mester un asistencia financiero pa mantene su mes. E mester por pidi y haya transferencia pa un chauffeur cu kier yuda e doño. Tambe por tin e caso cu mester por transferi e permiso pa un persona cu no ta miembro di famia, pero si ta dispuesto pa yuda sostene e famia.
