Un economia den expansion no ta yuda si e no ta traduci den menos desempleo y nivel di debe cu ta baha, esey tabata e conclusion di e rapport di Colina Financial Advisors Ltd. (“CFAL”) pa prome trimester di 2019 tocante economia di Bahamas.
Colina Financial Advisors Ltd. (“CFAL”) ta un compania independiente di asesoria y management cu base na Nassau, Bahamas, cu un reputacion di stabilidad y integridad, segun The Nassau Guardian.
E rapport di CFAL ta splica cu a pesar cu gobierno a haya bastante mas entrada di e VAT (BTW) cu a introduci pa mehora financia publico, ta keda motibo pa preocupacion riba tereno di desempleo, crecemento economico y nivel di debe.
“Si economia ta expande den areanan unda no ta contrata ciudadano di Bahamas, o ta afecta hende di Bahamas directamente, ta improbabel cu e cifra di desempleo ta bay baha significantemente bao di e normanan structural, y crecemento sostenibel a largo plaso lo keda for di nos alcance.”
E rapport ta mustra cu e reduccion significante cu gobierno a haci den gasto di capital compara cu gasto recurente ta demostra su gastonan tradicionalmente halto di salario y otro beneficio cu a conduci na inversion modera den infrastructura, salubridad y educacion, cu segun CFAL ta “esencial pa impulsa crecemento economico.”
E rapport ta nota cu e departamento di estadistica ta bisa cu economia di Bahamas lo crece cu 2,2% den aña fiscal 2018/2019. Sin embargo, ta observa tambe cu “crecemento economico tabatin un averahe relativamente abao di 0,30% den ultimo 6 aña, un indicacion convincente di e estado fragil di economia di e pais.”
