Nos ta parti di Europa…?

Eleccion pa parlamento Europeo a bin te bay. Un manyen di ciudadano so a haci uso di nan derecho di voto pa Parlamento Europeo. No cu esey ta straña nos; Union Europeo ta keda manera e Hulandesnan ta bisa: “een ver van mijn bed show.” Esey dificilmente ta bay cambia tambe. Si nos observa bon, na Europa mes tin hopi ciudadano cu no ta preocupa tanto cu loke ta pasa na Bruselas y otro sedenan di e Union. Hasta den e paisnan cu ta miembro organisador di e prome intento pa unifica Europa, cu tabata e asociacion pa defende interes economico riba tereno di carbon y staal, tin un grupo creciente di ciudadano cu ta cuminsa bira irita pa e ‘metemento’ di Union Europeo den nan asuntonan como pais. Di mes caba cu e confiansa den nan propio politiconan a cuminsa mengua severamente, te pa nan tin confiansa cu e mesun politiconan ey, na mas distancia ainda, ta bay atende nan interesnan na manera adecua.

Cu otro palabra, Union Europeo no ta pasando den su miho temponan, y e prueba palpable di esey naturalmente ta e salida di Reino Uni for di e grupo di pais Europeo, unda no ta sigur ainda ken ta sali menos beneficia, e Union o Reino Uni. E ultimo aki ta envolvi den un confusion completo, cu ta haci un salida sin preparacion di Reino Uni mas probable, mientras cu e efectonan negativo, sigur a corto plazo, por ta hopi grandi.

Y pa bolbe na nos isla chikito, pa nos mas ainda Union Europeo ta un mundo aleha di nos realidad, y probablemente e momento cu nos sa realisa cu nos ta pertenece na e union ey, ta ora nos tira un bon bista riba nos paspoort, y mira kico e ta bisa. Nos ta ciudadano di algo bastante desconoci, cu hasta ta bastante mas grandi, den poblacion anto, cu e pais mas poderoso di mundo. E cantidad di hende cu por a vota den e dianan aki na Europa, alrededor di 400 miyon, ta sobrepasa e poblacion total di Merca facilmente.

Sin embargo, talvez nos no ta realisa nos mes kico ta e bentahanan cu esaki ta trece pa nos. E solo hecho cu nos ta bay cualkier pais dentro di e Union y ta ser ricibi manera ciudadano di e mesun pais, ta haci un diferencia grandi. Hopi agradable ora di biaha, pero naturalmente e Union ta trece un otro banda di e medaya cune. Legislacion pa un parti importante ya no ta bin di Den Haag, sino di Union Europeo. Y no ta keda na Den Haag tampoco, pero ta yega cerca nos tambe. Y nos mester cumpli. Ademas, fuera di Union Europeo nos tin e cantidad di tratado internacional, di cual nos tin bastante ratifica, cu ta crea henter un cuadro legal den cual nos mester opera… y cumpli. Esey ta mustra facil tanten nos por haci manera e cosnan ey no t’ey, o cu nan ta meramente papel cu nos no mester preocupa mucho cu nan. Te ora yega e situacion unda si nos mester actua. Manera ta e caso awor cu e ‘refugiadonan’ Venezolano. Aki tambe nos por compara e situacion na Europa, unda varios pais a firma tratado, y ta di acuerdo pa reparti responsabilidad pa refugiado, pero ora yega momento di actua, tin hopi cu a purba pasa e problema pa e siguiente, y no asumi responsabilidad. Cerca nos e situacion di refugiado no a yega na un nivel realmente preocupante, a pesar di loke nos autoridadnan ta bisa, pasobra di baina nos ta mira e diferencia entre e situacion di mas di 20 aña caba, di ilegalidad na gran escala, y e situacion actual unda supuestamente tin miles di ‘refugiado’ pero pa straño cu e ta zona, nan tur tin dak riba nan cabes, nan tin entrada pa pone cuminda riba mesa, aparentemente, y gobierno mester construi ainda su prome shelter pa atende refugiado. Asina mes Hulanda ta pone miyones disponible, pero si no por cumpli cu e rekisitonan di proba cu tin refugiado, y cuanto nan ta costa, e placa ey ta keda na Den Haag…

Tambe tin e derechonan di mucha y hoben pa cual nos no a crea un sistema fuerte di supervision, ni tampoco a haci gran esfuerso pa influencia comportamento di nos ciudadanonan, cu e consecuencianan cu nos por mira atrobe den e dianan aki. Un hoben ta bira victima di abuso sexual y kico ta sucede? Un monton di hende grandi ta troce di tur manera posible pa tur hende keda bon, inclusive e criminal, menos e victima mes. Nos a kere cu algo ta bay cambia, cu no semper nos ta keda depende di e denuncia di e victima o di su mayornan, pero cu autoridadnan hudicial por actua riba nan mes, si nan constata cu tin un base pa inicia un investigacion penal, o en todo caso e investigacion preliminar, pa mira si tin base pa un investigacion penal completo. No ta esaki tabata e bunita palabranan di despedida di e procurador general saliente?

Nos no mester bira fanatico di e structuranan mas grandi cu nos; ban cuminsa pa comprende pakico nan ta y pakico nos mester cumpli, ora e situacion ta exigi esey. Mas no mester.