ORANJESTAD – DPL cu t’ey desde 2011 tin como meta pa “informa, stimula participacion laboral y yuda nos buscado y dunadonan di trabao local pa yega mas cerca di otro riba e mercado laboral”. Pero ken tur e gobiernonan a yuda di berdad pa medio di DPL? E trahado di afo?
Pasobra te dia di awe nos di CURPA no a tende di 1 caso ni a mira prueba di niun gobierno di 1 caso den cual 1 trahado local a haya trabou via DPL. Un solicitante local a conta nos cu DPL no ta ni uza e formulario mas cu e doñonan di trabou mester stempel ora cu un trahado local a solicita cerca dje. Pues e doñonan di trabou por gaña facilmente cu niun trahado local a solicita cerca nan. Y DPL ta informa e doñonan di trabou di e resultado di su peticion pa un trahado di afo pero te dia di awe nunca nos a mira un carta di DPL na unda e ta informa e trahado local cu a busca trabou via DPL kico a pasa despues cu el a solicita. Esey si ta keda scondi. Pakico ta paga belasting pa DPL y Dimas anto si keto bay tin ilegalnan trahando na gran escala, y permisonan ta wordo parti keto bay sin ningun evidencia di e controlnan necesario. Ainda nos ta tende di tramitador aki, tramitador ey cu “lo a regla permiso mas lihe cu Dimas”.
Un maneho di stranheria pa robes bou di tur gobierno cu a haci cu awor na hotelnan y restaurantnan tin trahado di afo ta ganando tips y mandando gran parti di e placa afo, mientras tanto e trahadonan local cu experiencia mes ta sinta na cas. Y cu a haci cu awor e hotelnan ta parce di ta haciendo tur esfuerso pa kita trahado local di hopi aña pa reemplasa nan cu cheap labor di afro. Y cu keto bay tin comerciantenan cu ta sigui pak Aruba cu mas trahado di afo sin importa tur e consecuencianan negativo pa socio economico, ambiental y financiero pa Nos Pais.
Hopi a wordo papia pero te dia awe niun gobierno por a prueba ningun resultado. P’esey nos ta kere cu ta bira tempo pa e gobierno aki tambe stop di papia y cuminsa haci. Lag’e instrui DPL pa e bin bek cu e formulario bek cu e doño di trabou ta stempel ora e hende local bin solicita y bin cu transparencia. Pa evita Caso Ibis parti 2. E bay mustra pueblo cuanto hende local a solicita via DPL pa cada vacatura (trabou), Y lag’e instrui Dimas publica pa cada vacatura (trabou) cua conseho el a ricibi di DPL. Pueblo tin derecho pa sa cuanto permiso a wordo duna door di Dimas pa cada tipo di trabou. Lag’e prueba cuanto boet e la duna na esunnan cu ta emplea ilegal y cuanto placa el a ricibi. Cuanto ilegal a wordo deporta. Y cuminsa recompensa e pueblo pa reporta ilegalidad.
Si gobierno no bin cu prueba, anto e ora ey e no a traha na interes di e trahadonan local y punto. Y si no tin transparencia, anto e riesgo a keda halto pa corupcion.
Nos ta liber pa scoge pero nos no ta liber di e consecuencianan. Pregunta ta kico boso como pueblo mes kier. E choice ta masha simpel. Si boso no tin problema cu un Aruba mas yen cada dia, mas desempleo local y ningun oportunidad pa boso yiunan (studia) vota pa tur otro partido. Pero si boso kier accion y resultado ta 1 opcion so tin y esey ta nos di partido CURPA.
