Un teremoto poderoso di magnitud 8.0 a dal un parti remoto di Amazona na Peru diadomingo trempan, causando collapse di edificio y lagando areanan sin coriente, pero causando unicamente un morto reporta.
E teremoto a dal pa 2.41 am y tabata centra den un reserva natural amplio, 92km oost di e pueblo chikito di Yurimaguas. Yudando pa limita e daño tabata e profundidad di e teremoto, na 114km bou di superficie, segun e U.S. Geological Survey. Teremoto cu ta cerca di e superficie generalmente ta causa mas destruccion.
Presidente Martín Vizcarra a pidi pa calma prome cu biaha na e zona cu miembronan di su gabinete pa evalua e daño. El a bisa cu prome reportenan ta indica cu un brug a collapse, y varios cas y caminda a ser afecta.
“Ta un teremoto cu a sinti a traves di e jungla Peruano”, Vizcarra a bisa, kende tabatin plan pa tene un cumbre regional ayera na e capital, cu presidente di Bolivia, Colombia y Ecuador.
Ricardo Seijas, hefe di e Centro Nacional di Operacion di Emergencia, a bisa cu un persona a muri ora un piedra a cay riba un cas den districto di Huarango.
Un evaluacion preliminar di autoridadnan a haya cu seis persona a resulta herida y 27 cas daña den shete provincia. Tres scol, tres hospital, y dos iglesia tambe tabata afecta.
Na Yurimaguas, un brug y varios cas bieu a collapse, y no tabatin coriente, segun e centro nacional. Imagennan circulando riba rednan social a mustra residentenan den varios parti di e pais cay den panico mientras e teremoto a sacudi edificionan.
E teremoto tambe a lanta hende na Lima for di soño, kende nan a core sali di nan cas cu miedo. “Tabata un teremoto hopi largo”, Maria Brito, kende ta biba na e di cinco piso di un edificio di apartamento den capital, a bisa. “E por tabata pio, y cu suerte el a caba.”
Teremoto ta frecuente na Peru, cu ta cay den e asina-yama ‘Ring of Fire’ (renchi di candela) den Pacifico. Dia 15 di augustus 2007, un teremoto di magnitud similar a dal Lima, matando mas di 500 persona.
