ORANJESTAD – E speransa crea durante Fase 1 y 2 pa Repsol pa descubri gas of petroleo den nos lama teritorial, a bira un decepcion den e Fase 3 di boramento. Dicon e perforacion den e localidad pre- selecciona, conoci como Bonbini, no a duna e resultado spera?

Director di Compania Arubano di Petroleo (CAP), Armando Curet a bisa na Bon Dia Aruba cu nos mester tene na cuenta cu, e area unda perforacion a sosode, ta uno di cual no tabatin suficiente informacion. Semper tin un riesgo geologico den loke ta wordo yama ‘area di frontera.’

Esaki ta e prome biaha cu den e area nobo, na cabes di Aruba, ta wordo compila datonan cientifico. Durante e dos fasenan, nan a realisa trabou preparatorio cu a inclui investigacion sismico general y despues mas detaya via 3D den un area selecciona mas chikito, unda e expertonan a wak e miho perspectivanan. Ademas nan a haci trabou di investigacionnan geo-kimico y trabou di ‘heat flow’ for di e calor cu ta sali di e sub-suelo.

A base di e datonan produci, Repsol tin cu sigui procesa y interpreta e datonan nobo logra durante e fase di boramento tambe. Kier men, e expertonan tin cu wak bon dicon no a haya locual a wordo premira, y purba di extende esaki den un area mas grandi. Esaki lo bay determina, den futuro, si e empresa aki por haya un idea nobo di e perspectiva di e area explora. Esaki ta e proceso –segun Curet- cu nan ta den dje actualmente.

Den e fase aki, Repsol y Total S.A., estableci na Paris, a comparti e gastonan cu ta mara na e fase di boramento, pa asina minimalisa nan riesgo financiero. Solamente cu den e caso aki Repsol ta e compania cu pais Aruba ta deal cune directamente.

Contract y inversion

E contract entre pais Aruba, representa pa su compania estatal CAP, y Repsol, a wordo firma na final di 2012, pero te aña pasa a haci e perforacion, ya cu a rekeri casi 6 aña di estudio y preparacion, debi cu no tabatin suficiente datonan den e area aki. Un suma alrededor di 55 miyon dollar a wordo gasta durante e tres fase realisa.

Den e inversion aki, pais Aruba no a core niun riesgo, pues no a haci niun inversion. Normalmente e proceso standard ta cu e compania estatal no ta participa den e fase di exploracion. Sino cu generalmente, e compania estatal tin opcion di participa for di e momento cu tin descubrimento. Durante e añanan aki –segun director di CAP- e compania Spaño, Repsol a cumpli cu tur su obligacion, segun e contract firma.